ეს კიდევ ერთი უტიფარი საქციელია. უდიდესი ეჭვი არსებობს, რომ მტკიცებულებები გაყალბდა,- ამის შესახებ „ევროპული საქართველოს“ ერთ-ერთმა ლიდერმა გიგა ბოკერიამ თბილისის პროკურატურის მიერ თემირლან მაჩალიკაშვილის საქმეზე გამოძიების შეწყვეტასთან დაკავშირებით განაცხადა.
„უდიდესი ეჭვი არსებობს, რომ მტკიცებულებების გაყალბება მოხდა. რა თქმა უნდა, ეს გვახსენებს იმას, რამდენი რამ გვაქვს შესაცვლელი ამ ქვეყანაში, მას შემდეგ რაც ივანიშვილის ხელისუფლებას ჩამოვაცილებთ, მთელი ამ სტრუქტურის რადიკალური რეფორმაა გასატარებელი, რათა მსგავსი შესაძლებლობა არც ერთ ხელისუფლებას აღარ ჰქონდეს“, - აღნიშნა ბოკერიამ.
შეგახსენებთ, რომ თბილისის პროკურატურამ თემირლან მაჩალიკაშვილის საქმეზე გამოძიება შეწყვიტა.
უწყების განმარტებით, „სრულყოფილი და ყოველმხრივი გამოძიების შედეგად დადასტურდა, რომ სპეციალური ოპერაციების სამმართველოს თანამშრომელი იმყოფებოდა აუცილებელი მოგერიების მდგომარეობაში, საფრთხე იყო რეალური, იმწუთიერი და მისი ქმედების მიზანს მხოლოდ ამ საფრთხიდან საკუთარი თავის და გარშემომყოფთა სიცოცხლის და ჯანმრთელობის დაცვა წარმოადგენდა, ასევე დადასტურდა, რომ სპეციალური დანიშნულების რაზმის არც ერთ წევრს და არც რომელიმე მაღალი თანამდებობის პირს კანონსაწინააღმდეგო და ბრალეული ქმედება არ ჩაუდენია".