საქართველოს პრეზიდენტს მხოლოდ გამოსვლის მე-40 წუთზე გაახსენდა ოკუპაცია. ეს კარგად მეტყველებს მის პრიორიტეტებზე, თუ რა ადგილი უჭირავს ოკუპაციის თემას , - ამის შესახებ „ევროპული საქართველოს“ ერთ-ერთმა ლიდერმა, დავით ბაქრაძემ განაცხადა.
მისი თქმით, განსაკუთრებული მოლოდინი ქალბატონ ზურაბიშვილის გამოსვლასთან დაკავშირებით არ ჰქონია, მაგრამ საქართველოს პრეზიდენტმა „კიდევ ერთხელ „მოახერხა“ მოლოდინის გამტყუნებაც“.
„აღარაფერს ვიტყვი იმ ტყუილებზე, რომელიც ჩვენ მოვისმინეთ, მაგალითად სასამართლოს დამოუკიდებლობასთან , საარჩევნო გარემოსთან ან მედიასთან და უმცირესობებთან მიმართებაში. გამოვყოფდი ორ ფაქტორს: პირველი, საქართველოს პრეზიდენტს მხოლოდ გამოსვლის მე-40 წუთზე გაახსენდა ოკუპაცია, ეს კარგად მეტყველებს მის პრიორიტეტებზე, თუ რა ადგილი უჭირავს ოკუპაციის თემას; და მეორე, ამ ორგანიზაციაში ათეულობით პრეზიდენტის და პრემიერ-მინისტრისთვის მაქვს მოსმენილი და ეს იყო პირველი შემთხვევა, სახელმწიფოს მეთაურს მისცეს ღია შენიშვნა მისი გამოსვლის ფორმასთან და რეგლამენტთან დაკავშირებით. მან მოახერხა, რომ ისიც დაიმსახურა, რაც ამ ორგანიზაციაში არ მომხდარა. რატომ? მიზეზი მარტივია - რაც შეიძლება ცოტა დრო დატოვა კითხვებისთვის. ჩვენ მოვისმინეთ უაღრესად კრიტიკული კითხვები, მოვისმინეთ უაღრესად კრიტიკული გამოსვლები და მოვისმინეთ ძალიან სუსტი, არაარგუმენტირებული და ხშირად არაკომპეტენტური პასუხები სალომე ზურაბიშვილის მხრიდან. ვთვლი, რომ ეს გამოსვლა არაფრით წაადგება ჩვენი ქვეყნის ეროვნულ ინტერესებს“, - განაცხადა დავით ბაქრაძემ.