სალომე ზურაბიშვილი - მხოლოდ შემწყნარებლობას შეუძლია გაგვაძლიეროს და წაგვიძღვეს მშვიდობისკენ

საქართველოს პრეზიდენტმა სალომე ზურაბიშვილმა ევროპის საბჭოს გენერალურ მდივანთან და საპარლამენტო ასამბლეის პრეზიდენტთან ერთად, მონაწილეობა მიიღო სტრასბურგში, ჰოლოკოსტის მსხვერპლთა ხსოვნის საერთაშორისო დღისადმი მიძღვნილ ღონისძიებაში და საპარლამენტო ასამბლეის წარმომადგენლებსა და მოწვეულ სტუმრებს სიტყვით მიმართა. ამის შესახებ ინფორმაციას საქართველოს პრეზიდენტის პრესსამსახური ავრცელებს.

საქართველოს პრეზიდენტის განცხადებით, ჰოლოკოსტი ეს ერთ-ერთი ყველაზე საშინელი ტრაგედიაა კაცობრიობის ისტორიაში, რომელმაც მილიონობით ადამიანის სიცოცხლე იმსხვერპლა.

გუშინ 75 წელი შესრულდა აუშვიც- ბირკენაუს საკონცენტრაციო ბანაკის გათავისუფლებიდან.

"გასულ კვირას, მსოფლიოს ათეულობით ლიდერთან ერთად, მსოფლიო ჰოლოკოსტის ფორუმს დავესწარი იერუსალიმში. საერთაშორისო ფორუმზე იად ვაშემში, მე ვნახე როგორ დავდეთ პირობა, რომ კაცობრიობა აღარასოდეს ივლის ამგვარი ბოროტი გზით. ეს ფაქტი ნამდვილად სინანულის გამოცდილება იყო. როგორც უკვე აღვნიშნე, 75 წელი გავიდა მას შემდეგ, რაც კაცობრიობის ყველაზე სამარცხვინო მომენტი დასრულდა. თუმცა, ეს ჩვენი პასუხისმგებლობაა, მას კლიტე დავადოთ. ანტისემიტიზმი დაავადებაა, რომელიც არამხოლოდ მის სამიზნეს აყენებს ზიანს - ერთ კონკრეტულ ერს - არამედ ზიანს აყენებს ყველა ადამიანს, ვინც ამ სიძულვილის გავრცელების თანამონაწილეა. ჰოლოკოსტის არსებობა ჩვენ არასდროს უნდა დაგვავიწყდეს და არასოდეს დავრთოთ ნება ბოროტ ძალებს ანტისემიტიზმი დღევანდელ თაობებში გაავრცელონ. როგორც საქართველოს პრეზიდენტი, მე ვამაყობ, რომ წარმოვადგენ ერს, რომელიც ებრაელ ხალხთან მუდმივად ინარჩუნებს მეგობრულ ურთიერთობებს. ეს მეგობრული ურთიერთობები არამხოლოდ დღევანდელი მთავრობის მიღწევაა, არამედ ისტორიულია.

ებრაელ ხალხთან 26 საუკუნოვანი ურთიერთობა გვაკავშირებს და ჩვენს ერში ამ ისტორიის მანძილზე ვერც ერთი ანტისემიტური შემთხვევა ვერ მოიძებნება. როგორც ჩვენი ებრაელი მეგობრები ამბობენ, ქართველები ერთადერთი ერის წარმომადგენლები არიან, ვისაც ებრაელების წინაშე ბოდიში არ აქვთ მოსახდელი. შემწყნარებლობა მსოფლიო მშვიდობისთვის მთავარი აუცილებელი ფასეულობაა. დღევანდელ სამყაროში ამ ფასეულობის ნაკლებობაა, მაგრამ საქართველოს არასდროს გადაუხვევია პატივისცემის, გაგებისა და შემწყნარებლობის კურსიდან. ანტისემიტიზმის უარყოფა არ არის საკმარისი სიამაყისთვის, ისევე როგორც არ უნდა იყო ამაყი, რომ არ ხარ კრიმინალი. მე ამაყი ვარ იმ მეგობრობით, რომელიც ჩვენ შემწყნარებლობამ მოგვიტანა. მე უკვე შეთავაზებული მაქვს, რომ ეს "ქართული ტოლერანტობა" შეტანილი იყოს იუნესკოს არამატერიალური კულტურული მემკვიდრეობის სიაში, რათა გავაძლიეროთ ეს ტრადიცია და ვაჩვენოთ, რამდენად ვაფასებთ ამ ღირებულებებს. ჩემთვის პატივია სტრასბურგში ყოფნა, ასეთ დასამახსოვრებელ დროს. ფასეულობები, რომლებიც ახასიათებს სტრასბურგს, ბრიუსელს, ან მთლიან ევროპას დაცული უნდა იყოს”, - განაცხადა პრეზიდენტმა.

მისივე თქმით, მხოლოდ შემწყნარებლობას შეუძლია "წაგვიძღვეს უკეთესი მომავლისკენ."

"მხოლოდ შემწყნარებლობას შეუძლია წაგვიძღვეს მშვიდობისკენ და დაცულობისკენ, გაგვაძლიეროს, სანამ ჩვენ ვეჭიდებით მნიშვნელოვან გამოწვევებს. მხოლოდ შემწყნარებლობას შეუძლია წაგვიძღვეს უკეთესი მომავლისკენ", - განაცხადა საქართველოს პრეზიდენტმა.

კორნელი კაკაჩია - ხელისუფლებამ უნდა შეძლოს ქვეყნის გადაყვანა დაპირისპირების რელსებიდან კონსტრუქციულობის ფორმატში, თუმცა ამის რესურსს მმართველ გუნდში ვერ ვხედავ
დიმიტრი შველიძე - რუსული ოკუპაციის 100 წლისთავზე მთავარია გვახსოვდეს - ყოფილი მეტროპოლია ფარული ჩარევით, მშვიდად უყურებს საქართველოში პოლიტიკური ბანაკების გაუთავებელ ომს
ქართული პრესის მიმოხილვა 26.02.2021
ახალი სენსორული POS სავაჭრო ობიექტებისთვის
რას წარმოადგენს Samsung-ის ოფიციალური ჰოლოგრამა?
სითი თაუერი – შენი წარმატების წერტილი ბიზნესში! (R)
კომპანია "სილქნეტი" განცხადებას ავრცელებს
როგორ შეუძლიათ ბიზნესებს თანამშრომელთა სამუშაო საათები ავტომატურად აღრიცხონ?
ბაკურიანის მსოფლიო თასის ეტაპებისთვის რეგისტრაცია დასრულებულია
ჰააგის სისხლის სამართლის საერთაშორისო სასამართლოსთან არსებულმა დაზარალებულთა ნდობის ფონდმა საქართველოსთვის დახმარების პროგრამა დაამტკიცა
ლაბორატორია „მეგალაბში“ კორონავირუსის ე.წ. ბრიტანული შტამის დადგენაა შესაძლებელი