განუზომელი თავხედობა და უსამართლობაა, რაც „ქართულმა ოცნებამ“ მაჩალიკაშვილების ოჯახთან მიმართებით ჩაიდინა, - ამის შესახებ პარტია „ახალი საქართველოს“ ლიდერმა გიორგი ვაშაძემ განაცხადა, რითაც პროკურატურის მიერ თემირლან მაჩალიკაშვილის საქმის გამოძიების შეწყვეტის საკითხს გამოეხმაურა.
მისი თქმით, „ქართულმა ოცნებამ“ გადაწყვიტა, რომ საარჩევნო კამპანიის დაწყებამდე „გაასუფთავოს ველი“.
„ოცნების“ ლიდერებო, ერთი რამე იცოდეთ, ვერაფერს ვერ გაისუფთავებთ. თქვენ გაგასუფთავებთ ჩვენ მაჩალიკაშვილთან და სხვა უსამართლოდ დაჩაგრულ ადამიანებთან ერთად იმიტომ, რომ თქვენ ხართ ამ ქვეყნის მტერი და უბედურება. აუცილებლად დამარცხდებით წელს, იმიტომ, რომ ჩვენ ამას ვერ ავიტანთ. ამ უსამართლობას და უკანონობას ვერ ავიტანთ“, - განაცხადა გიორგი ვაშაძემ.
შეგახსენებთ, თბილისის პროკურატურამ თემირლან მაჩალიკაშვილის საქმეზე გამოძიება შეწყვიტა.