მაქსიმალურად შევეცდებით, რუსეთის დელეგაციას შევუქმნათ ყველანაირი დისკომფორტი ევროსაბჭოს საპარლამენტო ასამბლეაში მათი მუშაობის კუთხით, - ამის შესახებ საქართველოს პარლამენტის თავმჯდომარის მოადგილემ, კახაბერ კუჭავამ განაცხადა.
კახა კუჭავა გამოეხმაურა იმ ფაქტს, რომ ევროპის საბჭოს საპარლამენტო ასამბლეამ მხარი არ დაუჭირა უკრაინისა და პარტნიორი ქვეყნების წარმომადგენელთა წინადადებას რუსეთის დელეგაციის უფლებამოსილების შეზღუდვის თაობაზე და რუსეთს უფლებამოსილება სრულად აღუდგინა.
„დღევანდელ ამ გადაწყვეტილებას წინ უძღოდა გადაწყვეტილება მინისტრთა საბჭოს მიერ, ეს ფაქტობრივად იმის წინაპირობა იყო, რომ ალბათ, ასეც მოხდებოდა და ეს ვიცოდით. თუმცა, ჩვენ შევეცადეთ ბოლომდე. სამწუხარო იყო, რომ საბოლოო გადაწყვეტილება მათ სასარგებლოდ იყო მიღებული, მითუმეტეს იმ სამარცხვინო გამოსვლების შემდეგ, რომელიც მათ ჰქონდათ ტრიბუნაზე, თუმცა ვთვლით, რომ აუცილებელი იყო დღეს დაფიქსირებულიყო ის, რაც დაფიქსირდა ჩვენი მხრიდან, უკრაინელების მხრიდან, სხვა ჩვენი ქვეყნების მეგობარი და მომხრეების მხრიდან. დარწმუნებული ვარ, რომ ეს მხოლოდ დასაწყისია და კიდევ უფრო გავურთულებთ მათ მუშაობას. მაქსიმალურად შევეცდებით შევუქმნათ ყველანაირი დისკომფორტი ევროსაბჭოს საპარლამენტო ასამბლეაში მათი მუშაობის კუთხით“, - განაცხადა კუჭავამ.
აღნიშნულ კომენტარს პარლამენტის პრესსამსახური ავრცელებს.