იტალიაში ახალი კორონავირუსის პირველი შემთხვევები დადასტურდა, - ამის შესახებ ქვეყნის პრემიერ-მინისტრმა ჯუზეპე კონტემ პრესკონფერენციაზე განაცხადა.

მისივე თქმით, ვირუსი ორ ჩინელ ტურისტს აღმოაჩნდა, რომელთა მდგომარეობა ამ დროისთვის დამაკმაყოფილებელია.

„იტალიაში კორონავირუსის დადასტურებული შემთხვევები გვაქვს,“- განაცხადა კონტემ და დასძინა, რომ მთავრობამ ჩინეთთან საჰაერო მიმოსვლის აკრძალვის გადაწყვეტილება მიიღო.

შეგახსენებთ, რომ ამ დროისთვის არსებული მონაცემებით, ჩინეთში, ახალი კორონავირუსით დაღუპულთა რაოდენობა 213-ია, ხოლო დადასტურებულმა შემთხვევებმა 9,692-ს მიაღწია. ჩინეთის გარდა, ვირუსის შემთხვევები 19 ქვეყანაშია დადასტურებული, სადაც, საერთო ჯამში, დაინფიცირების 100-ზე მეტი შემთხვევაა გამოვლენილი.

ჯანდაცვის მსოფლიო ორგანიზაციამ ახალი კორონავირუსი საზოგადოებრივი ჯანმრთელობის გლობალურ საფრთხედ გამოაცხადა.