ავსტრალიის ფედერალური ტერიტორიის (ACT) ხელისუფლებამ ტყის ხანძრის გაძლიერების გამო საგანგებო მდგომარეობა გამოაცხადა, - ამის შესახებ ინფორმაციას „ბი-ბი-სი“ ავრცელებს.

გამოცემის ცნობით, 18,500 ჰექტარი ტერიტორიის ფართობზე ძლიერი ცეცხლის ალია გავრცელებული. ხელისუფლება აცხადებს, რომ კანბერას რეგიონში ბოლო 20 წლის განმავლობაში ყველაზე ძლიერი ხანძრები მძვინვარებს.

ხელისუფლებამ კანბერას მოსახლეობას საჭიროების შემთხვევაში ევაკუაციისთვის მზადყოფნისკენ მოუწოდა.

ფედერალური ტერიტორიის მთავარი მინისტრის ენდრიუ ბარის თქმით, ხანძარი, შესაძლოა უკონტროლო გახდეს. მისივე ინფორმაციით, საგანგებო მდგომარეობა მანამდე გაგრძელდება, სანამ კანბერა რისკის ქვეშ იქნება.

ფედერალური ტერიტორია სიდნეისა და მელბურნს შორის მდებარეობს. მისი მოსახლეობა 400,000 ადამიანს შეადგენს.

შეგახსენებთ, ავსტრალიაში გავრცელებულ ტყის ხანძრებს სექტემბრიდან დღემდე 33 ადამიანის სიცოცხლე ემსხვერპლა, განადგურდა ათასობით სახლი და დაიწვა 11 მილიონი ჰექტარი ტერიტორია.