ეკონომიკისა და მდგრადი განვითარების მინისტრი ნათია თურნავა წელს ახალი ტრენინგ ცენტრის გახსნას აანონსებს, სადაც მისი თქმით, ქართველი მძღოლები საერთაშორისო დონეზე აღიარებულ სერთიფიკატებს მიიღებენ.

„მიმდინარე წლის თებერვალ-მარტში უკვე შევძლებთ დავიწყოთ ამ ცენტრის მშენებლობა. საუბარია ჩვენი სახმელეთო ტრანსპორტის ადმინისტრაციის ეგიდით სწავლებაზე, რომელიც დღესაც მიმდინარეობს. საკმაოდ მოთხოვნადია ჩვენი ქართველი მძღოლების სერთიფიცირება და მათი ევროპულ ბაზრებზე დასაქმება. პირველ რიგში ჩვენ ჩავთვალეთ, რომ ცალკე ტრენინგ ცენტრი უნდა არსებობდეს. ქართველო მძღოლები, ლოჯისტიკური მენეჯერები და სხვა სახმელეთო ტრანსპორტთან დაკავშირებული პროფესიების ადამიანები გადამზადდებიან ამ ცენტრში და ეს სერტიფიკატები აღიარებული იქნება მთელ მსოფლიოში,"-აღნიშნა თურნავამ.

მისივე თქმით,სერთიფიკატები დღესაც არის აღიარებული, თუმცა ეს წრე უფრო გაფართოვდება.

„ეს არის მნიშვნელოვანი პროექტი, რომელიც დასაქმებას ხელს უწყობს მთელი ევროკავშირის მასშტაბით,"-განაცხადა თურნავამ.