ე.წ. მაზავშიკების საქმეში ფიგურანტ დავით ფეიქრიშვილსა და ე.წ. კრიმინალურ ავტორიტეტს, ვატო ყიფიანს შორის არსებობს თუ არა რაიმე სახის კონფლიქტი, რის გამოც შეიძლებოდა ყიფიანს ძმები ფეიქრიშვილების მკვლელობის მომზადების საქმეზე ასაფეთქებელი მოწყობილობა შეეკვეთა, დაზარალებულების ადვოკატის გიორგი ანთაძისთვის უცნობია.

აღნიშნული ფაქტის შესახებ, რომლის მიხედვითაც, ფეიქრიშვილების საქმეში ასაფეთებელი მოწყობილობა ვატო ყიფიანის შეკვეთით დამზადდა, ადვოკატმა „ინტერპრესნიუსისგან“ შეიტყო.

„ნამდვილად არ ვიცი მათ შორის რა კავშირი შეიძლებოდა ყოფილიყო. ერთადერთი ის ვიცი, რომ ე.წ. მაზავშიკების საქმეზე, როგორც დავით ფეიქრიშვილი, ასევე ვატო ყიფიანი უკანონოდ იყვნენ ბრალდებულები. ასე ვფიქრობთ დაცვის მხარე. როგორც ვიცი, ვატო ყიფიანი მაშინ გამართლდა კიდეც“, - აცხადებს ანთაძე.

კითხვაზე, თუ რა ახსნა აქვთ ძმებ ფეიქრიშვილებს ვატო ყიფიანის მიერ ასაფეთქებელი მოწყობილობის შეკვეთაზე, ადვოკატი პასუხობს, რომ

დღის განმავლობაში მათთან შეხება არ ჰქონია. თუ რამდენად სარწმუნოა ერთ-ერთ შემკვეთად ყიფიანის დასახელება, აღნიშნულთან დაკავშირებით ანთაძე არ საუბრობს.

„გამოძიებაში ვერ ჩავერევი, ჩემ აზრს მნიშვნელობა არ აქვს რამდენად სარწმუნოა, ან არ არის სარწმუნო. მათი ურთიერთობის შესახებ ჩემთვის ცნობილი არ არის“, - აცხადებს ადვოკატი.