ამერიკა განაგრძობს რუსეთის წინააღმდეგ სანქციების დაწესებას, ვიდრე ის აღმოსავლეთ უკრაინაში აგრესიას არ შეწყვეტს და ყირიმის ოკუპაციას არ დაასრულებს. ამის შესახებ ამერიკის სახელმწიფო დეპარტამენტის პრესმდივანმა მორგან ორთაგუსმა „ტვიტერის“ გვერდზე დაწერა.

„დღეს ჩვენ უკრაინაში პატივი მივაგეთ მათ ხსოვნას, ვინც უკრაინაში რუსეთის აგრესიას ემსხვერპლა. ჩვენ განვაგრძობთ რუსეთის წინააღმდეგ სანქციების დაწესებას, ვიდრე ის არ აიღებს პასუხისმგებლობას დონბასში მშვიდობის დამყარებაზე და არ შეწყვეტს ყირიმის ოკუპაციას. ჩვენ მხარს ვუჭერთ უკრაინას“ , -წერს პრესმდივანი.

ცნობისთვის, ამერიკის სახელმწიფო მდივანი მაიკლ პომპეო ვიზიტით უკრაინაში ჩავიდა. მისი განცხადებით, აშშ მხარს უჭერს უკრაინის ტერიტორიულ მთლიანობას და არასოდეს სცნობს რუსეთის მიერ ყირიმის ანექსიას.

პომპეოს თქმით, ამერიკა მომავალშიც მხარს დაუჭერს უკრაინის ნატო-ში გაწევრიანებისკენ სწრაფვასა და ევროკავშირთან დაახლოებას.