„ერთიანი ნაციონალური მოძრაობის“ თავმჯდომარე გრიგოლ ვაშაძე, საერთაშორისო მდივანი სალომე სამადაშვილი და პარტიის საერთაშორისო ურთიერთობების დეპარტამენტის ხელმძღვანელი, ირაკლი ქავთარაძე ბრიუსელში „ევროპის სახალხო პარტიის“ პრეზიდენტს დონალდ ტუსკს შეხვდნენ, სადაც საქართველოში მიმდინარე პოლიტიკური მოვლენები განიხილეს. ამის შესახებ „ინტერპრესნიუსს“ პარტიის პრესსამსახურიდან აცნობეს.
მათი ინფორმაციით, შეხვედრაზე განსაკუთრებული ყურადღება დაეთმო საარჩევნო სისტემის რეფორმის აუცილებლობას, ქვეყნის დემოკრატიული ინსტიტუტების რღვევას, ოპოზიციის ლიდერების წინააღმდეგ მიმდინარე პოლიტიკურ დევნას და ამ მიზნით, ხელისუფლების მიერ სამართალდამცავი და სასამართლო სისტემის ინსტრუმენტალიზაციას.
როგორც პარტიის მიერ გავრცელებულ ინფორმაციაშია აღნიშნული, 3-4 თებერვალს ენმ-ის დელეგაცია მონაწილეობას მიიღებს „ევროპის სახალხო პარტიის“ პოლიტიკურ ასამბლეაში და შეხვედრებს გამართავს ევროპარლამენტის წევრებსა და პარტნიორი პარტიების წარმომადგენლებთან.