ჩვენი ხალხის თვისებაა - ითმენს, ითმენს და მოთმინების ფიალა რომ ივსება, მერე ზვავი მოდის. ეს თუ მოხდება, ირაკლი კობახიძე, სოფო კილაძე და მათნაირები ისევე დაიმალებიან, როგორც იქამდე იმალებოდნენ, - ამის შესახებ დამოუკიდებელმა დეპუტატმა ეკა ბესელიამ ჟურნალისტებს განუცხადა.
მისი თქმით, ვისაც მმართველ გუნდში ჭკუა მოეკითხება, უნდა მიხვდეს, რომ ქვეყანაში შექმნილ მდგომარეობას აშშ-ში ვიზიტები ვერ უშველის.
„ირაკლი კობახიძეს არასდროს უბრძოლია „ნაციონალური მოძრაობის“ წინააღმდეგ, მაგრამ თვალს ხომ ადევნებდა, ჭუჭრუტანიდან ხომ იყურებოდა ჩუმად და ხომ ხედავდა, რომ ჩვენი ხალხის თვისებაა - ითმენს, ითმენს და მოთმინების ფიალა რომ ივსება, მერე ზვავი მოდის. თუ ამას ელოდებიან, კობახიძე, კილაძე და მათნაირები ისევე დაიმალებიან, როგორც იქამდე იმალებოდნენ. კობახიძეს ჭკუა არ მოეკითხება, მაგრამ ვინმეს თუ ჭკუა მოეკითხება, ისინი უნდა მიხვდნენ, რომ აშშ-ში ვიზიტები კი ვერ უშველის ამ პროცესს, არამედ ამ პროცესს უშველის გადაწყვეტილებები, ნაბიჯები და კონკრეტული შედეგი,“ - განაცხადა ბესელიამ.