მესმის, რომ ის არის შვილმკვდარი მამა, არის გამწარებული და გაღიზიანებული, მაგრამ ადამიანებს აქვთ თავისი უფლებები და მგონი ჟურნალისტებს არაფერი დაუშავებიათ საიმისოდ, რომ ასეთ მიმართვას იმსახურებდნენ, - ამის შესახებ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ სოფო კილაძემ ჟურნალისტებს განუცხადა, რითიც გამოეხმაურა მალხაზ მაჩალიკაშვილის მიერ ჟურნალისტისადმი სიტყვიერი შეურაცხყოფის ფაქტს.
მისივე თქმით, ასეთი მიმართვა არ არის მოსაწონი.
„ესენი არიან ადამიანები, რომლებიც 24-საათიან რეჟიმში მუხლჩაუხრელად მუშაობენ იმისთვის, რომ საზოგადოებას მიაწოდონ ინფორმაცია. ასეთი დამოკიდებულება და მიმართვა არც ჟურნალისტების და არც არავის მიმართ არ ეპატიება", - განაცხადა კილაძემ.
შეგახსენებთ, რომ პარლამენტთან მიმდინარე აქციაზე მალხაზ მაჩალიკაშვილმა ტელეკომპანია „იმედის“ ჟურნალისტს სიტყვიერი შეურაცხყოფა მიაყენა.