ვიცე-პრემიერი, რეგიონული განვითარებისა და ინფრასტრუქტურის მინისტრი მაია ცქიტიშვილი საქართველოში ევროკავშირის ელჩს კარლ ჰარცელს შეხვდა. ამის შესახებ „ინტერპრესნიუსს“ რეგიონული განვითარებისა და ინფრასტრუქტურის სამინისტროდან აცნობეს.

მხარეებმა ევროპული საფინანსო ინსტიტუტების დახმარებით განხორციელებული და მიმდინარე პროექტები განიხილეს.

დეცენტრალიზაციისა და რეგიონული განვითარების კონტექსტში საუბარი შეეხო ადგილობრივ თვითმმართველობებში კომპეტენციის გაძლიერების მნიშვნელობას.

ევროკავშირის მხარდაჭერით, ინტეგრირებული რეგიონული განვითარების საპილოტე პროგრამები ოთხ რეგიონში ხორციელდება, ესაა: იმერეთი, გურია, კახეთი და რაჭა.

საპილოტე რეგიონების დაფინანსების დიდი ნაწილი მიიმართება რეგიონული ცენტრების ეკონომიკური, კულტურული და სოციალური როლისა და ფუნქციების გაძლიერებისათვის, ახალი ურბანული მიზიდულობის კერების ჩამოყალიბების, ასევე ყოფილი სამრეწველო, ინდუსტრიული ქალაქებისა და აუთვისებელი ტერიტორიების განახლებისათვის. ამავდროულად, პროგრამის ფარგლებში დაფინანსდება ინფრასტრუქტურის მოწესრიგების, ბიზნესების განვითარებისა და ახალი უნარების შეძენისთვის საჭირო სხვადასხვა სახის ღონისძიება.

პროგრამის ხედვა ეფუძნება ევროკავშირის რეგიონული განვითარების პოლიტიკის უახლეს მიდგომებს, რაც გულისხმობს ტერიტორიაზე მორგებული ურთიერთდაკავშირებული ღონისძიებების ეფექტიან დაგეგმვასა და განხორციელებას.