თურქეთში, საქართველოს საელჩოს ხელშეწყობითა და ანკარის პოლიფონიური გუნდის - Anchorus ორგანიზებით, ანკარის ნაზიმ ჰიქმეთის სახელობის კულტურისა და ხელოვნების ცენტრში „სტამბოლის ქართული ხელოვნების სახლის“ მრავალხმიანი კამერული გუნდის კონცერტი გაიმართა, რომლის ფარგლებშიც, გუნდის წევრების მიერ ხალხური სიმღერები ქართულ, აფხაზურ, მეგრულ, ჩერქეზულ, ჩეჩნურ და თურქულ ენებზე შესრულდა. ამის შესახებ „ინტერპრესნიუსს“ საგარეო საქმეთა სამინისტროდან აცნობეს.

სამინისტროს ინფორმაციით, კონცერტის ფარგლებში, საქართველოს ელჩმა გიორგი ჯანჯღავამ დამსწრე საზოგადოებას სიტყვით მიმართა და გუნდის ხელმძღვანელს, იბერია ოზქან მელაშვილს სამადლობელი სიგელი გადასცა. კონცერტის დასრულების შემდეგ, საქართველოს ელჩმა ანკარის ქართული დიასპორის წარმომადგენლებთან შეხვედრა გამართა.

ღონისძიებას თურქეთის სამოქალაქო და შემოქმედებითი საზოგადოების, აკადემიური წრეებისა და ქართული დიასპორული ორგანიზაციების წარმომადგენლები, ასევე ანკარაში მყოფი ქართველი სტუდენტები ესწრებოდნენ.

სამინისტროში განმარტავენ, რომ გუნდი ეთნიკურად ქართველი და თურქი ახალგაზრდებით არის დაკომპლექტებული.