პენტაგონის ინფორმაციით, იანვარში ირანის მიერ ერაყში თავდასხმის დროს 109 ამერიკელი ჯარისკაცი დაშავდა
აშშ-ის თავდაცვის უწყების ინფორმაციით, 8 იანვარს, ირანის მიერ ერაყში ამერიკულ ბაზებზე თავდასხმის შედეგად 109 სამხედრომ თავის ტვინის ტრავმული დაზიანება მიიღო. არმიის გენერალის, მარკ მილეის თქმით, 109 სამხედროდან 76 საკუთარი მოვალეობის შესრულებას დაუბრუნდა. მისივე თქმით, დაზიანებები მსუბუქი იყო.
ცნობისთვის, წინა ჯერზე, პენტაგონში აცხადებდნენ, რომ თავდასხმის შედეგად 64 ჯარისკაცი იყო დაზარალებული. თემას მაშინ აშშ-ის პრეზიდენტი, დონალდ ტრამპიც გამოეხმაურა და განაცხადა, რომ ჯარისკაცებს სერიოზული არაფერი სჭირდათ, „თავი და კიდევ რაღაცები სტკიოდათ“.
ირანმა ერაყში ამერიკულ ბაზებზე თავდასხმა, გენერალ ყასემ სოლეიმანის მკვლელობის შემდეგ განახორციელა. სოლეიმანი იანვრის დასაწყისში, ბაღდადის აეროპორტში განხორციელებული სამხედრო ოპერაციის დროს მოკლეს.
