„ნაციონალური მოძრაობის” თავმჯდომარის, გრიგოლ ვაშაძის განცხადებით, ოპოზიცია საპროტესტო აქციების ტალღის აგორებას აპირებს. როგორც მან ჟურნალისტებთან საუბრისას განაცხადა, ხელისუფლების დამარცხებისთვის კიდევ ერთი გამოსავალი მაჟორიტარულ ოლქებში საერთო კანდიდატების წარდგენაა.

„სამართლებრივი უმსგავსობის შემდეგ, რაც გუშინ ხელისუფლებამ გააკეთა, ოპოზიციას რჩება ორი ერთდროული გამოსავალი. პირველი - საპროტესტო აქციების ტალღის აგორება, რაც შეიძლება მასშტაბური და რაც შეიძლება ისეთი, სადაც საქართველოს მოქალაქე გამოხატავს თავის აზრს. მეორე - დაწყებული გვაქვს ჩვენ თბილისის მაჟორიტარულ ოლქებზე საუბარი და შემდეგ გადავალთ სხვა ოლქებზე.

აუცილებად უნდა დავამარცხოთ ეს ხელისუფლება, იმიტომ, რომ ყველაზე რეპრესიულ რეჟიმებსაც კი ნაკლები პოლიტპატიმარი ჰყავს, ვიდრე დღეს ჰყავს ოლიგარქიულ რეჟიმს”,- განაცხადა ვაშაძემ.

შეკითხვაზე, ხომ არაა მოსალოდნელი, რომ ოპოზიციის სხვა ლიდერებიც დააკავონ, ვაშაძემ განაცხადა, რომ „პოლიტიკური დევნა და დაპატიმრებები გიგი უგულავაზე არ დამთავრდება”.

„ქართული ოცნების” განზრახვების ამოცნობა მედიცინის ცალკე დარგია, მაგრამ ეჭვი არ მეპარება, რომ რეპრესიები, პოლიტიკური დევნა და დაპატიმრებები გიგი უგულავაზე არ დამთავრდება“, - განაცხადა ვაშაძემ.