ანა დოლიძე და „აზარტული თამაშების წინააღმდეგ“ კამპანიის წარმომადგენლები საქართველოში ევროსაბჭოს ოფისის ხელმძღვანელებს შეხვდნენ

აზარტულ თამაშებთან დაკავშირებით არსებულ მძიმე სოციალურ და ეკონომიკურ პრობლემებზე ისაუბრეს იურისტმა ანა დოლიძემ და „აზარტული თამაშების წინააღმდეგ“ კამპანიის წარმომადგენლებმა საქართველოში ევროპის საბჭოს ოფისის ხელმძღვანელთან კრისტიან ურსისთან და ოფისის ხელმძღვანელის მოადგილესთან ვაჰაგუნ მურადიანთან. ამის შესხებ "ინტერპრესნიუსს" ანა დოლიძის პრესსამსახურიდან აცნობეს.

მათივე ინფორმაციით, შეხვედრაზე აზარტულ თამაშებში საქართველოს მოქალაქეების და განსაკუთრებით არასრულწლოვნების ჩართულობის მასშტაბები და პრობლემები განიხილეს. ასევე ისაუბრეს ონლაინ თამაშების რეკლამის რეგულაციების არ არსებობაზე და საკანონმდებლო ცვლილებებზე, რომლის განხილვასაც პარლამენტი დღემდე აჭიანურებს.

„ძალიან მნიშვნელოვანია, რომ ევროსაბჭოს ოფისი საქართველოში დაინტერესდა აზარტული თამაშების პრობლემებით. ჩვენ ვისაუბრეთ იმ გზებზე და მექანიზმებზე, რომელიც ონლაინ თამაშების დარეგულირებას შეუწყობს ხელს. აუცილებელია, რომ ჩვენს ქვეყანაში გაზიარებული იყოს იმ ევროპული ქვეყნების გამოცდილება, რომლებმაც შეძლეს ამ სენის რეგულაციაში მოქცევა და საკუთარი მოსახლეობის დაცვა. ამიტომ ევროპის საბჭოს წარმომადგენლების დაინტერესება და ჩართვა ამ პრობლემის წინააღმდეგ ბრძოლაში ჩვენთვის განსაკუთრებით აქტუალურია“, - განაცხადა შეხვედრის დასრულების შემდეგ ანა დოლიძემ.

მათივე ინფორმაციით, შეხვედრა საქართველოში ევროპის საბჭოს ოფისში გაიმართა.

მარკო მიკელსონი - საქართველომ ყურადღების მოსაპოვებლად უნდა იბრძოლოს - პატარა ქვეყნები იმაზე დიდები უნდა ვიყოთ, ვიდრე ფიზიკურად ვართ
ქართული პრესის მიმოხილვა 25.02.2020
ირაკლი მელაშვილი - ვფიქრობ, საარჩევნო სისტემასთან დაკავშირებით არსებულ  ფონზე ხელისუფლებას გაუჭირდება ოპოზიციისთვის მოლაპარაკებების ჩაშლის გადაბრალება
როგორ დავაჩქაროთ მდგრადი განვითარების მიზნების განხორციელება აზიასა და წყნარ ოკეანეთში