გიორგი მარგველაშვილი პოლიტიკაში დაბრუნებაზე - როდესაც კითხვის ნიშნის ქვეშ დგება ჩვენი ქვეყნის კურსი და მომავალი, ბუნებრივია, მე დავიწყებ აქტიურ კონსულტაციებს, როგორ დავიცვა ის, რასაც ჩემი თაობის ადამიანები თავისი სიცოცხლით იცავდნენ

მე დავიწყებ აქტიურ კონსულტაციებს იმასთან დაკავშირებით, როგორ უზრუნველვყო და დავიცვა ის, რასაც ჩემი თაობის ადამიანები თავისი სიცოცხლით იცავდნენ - საქართველოს დამოუკიდებლობა, - ამის შესახებ საქართველოს ყოფილმა პრეზიდენტმა გიორგი მარგველაშვილმა ტელეკომპანია „პალიტრანიუსის“ გადაცემაში „360 გრადუსი“ განაცხადა. ამით მარგველაშვილმა უპასუხა გადაცემის წამყვანის შეკითხვას, აპირებს თუ არა პოლიტიკაში დაბრუნებას. ყოფილი პრეზიდენტის განცხადებით, ყველა მისი პოლიტიკური მცდელობა ოპოზიციური ერთობის მხარდამჭერი და გამაძლიერებელი იქნება.

„როდესაც დასავლელ პარტნიორს წერილებს უკან მიაყრი და ეტყვი, რომ მისი კომპეტენცია არ არის, ეს სიცარიელე ასე არ დარჩება. ამ სიცარიელეს აუცილებლად შეავსებს ჩვენი ჩრდილოელი მეზობელი. ამ ვითარებაში, როდესაც კითხვის ნიშნის ქვეშ დგება ჩვენი ქვეყნის კურსი და მომავალი, ბუნებრივია, მე დავიწყებ აქტიურ კონსულტაციებს იმასთან დაკავშირებით, როგორ უზრუნველვყო და დავიცვა ის, რასაც ჩემი თაობის ადამიანები თავისი სიცოცხლით იცავდნენ - საქართველოს დამოუკიდებლობა. არც ერთ შემთხვევაში არ იქნება ისეთი რამ, რაც რაიმე მიმართულებით ოდნავ მაინც შეასუსტებს ოპოზიციურ ერთობას. ყველაზე ფასეული დღეს ჩემთვის არის ის ოპოზიციური ერთობა, რომელიც შედგა. ყველა ჩემი პოლიტიკური მცდელობა იქნება იმ ერთობის მხარდამჭერი და გამაძლიერებელი. დანარჩენი დეტალებია “, - განაცხადა გიორგი მარგველაშვილმა.

მისივე თქმით, საუკეთესო ვარიანტი იქნებოდა, რომ მოლაპარაკების მაგიდასთან ოპოზიციასა და ხელისუფლებას შორის შეთანხმება მომხდარიყო, თუმცა, როგორც მარგველაშვილი აცხადებს, შეუძლებელია მოლაპარაკების მაგიდასთან დარჩენა, როცა მაგიდის წევრებს აპატიმრებენ.

„ძალიან ნათელია, რა უნდა ოპოზიციას. ჯერ მარტო იმიტომაა ნათელი, რომ მთელი ოპოზიცია გაერთიანებულია. ყველასათვის ცხადია, რომ ოპოზიციას ნორმალური საარჩევნო სისტემა უნდა. რა კომენტარს გააკეთებენ ადამიანები, რომლებიც სენატორებისთვის მენტალიტეტის შეცვლას აპირებენ, ამას მნიშვნელობა არ აქვს. საუკეთესო ვარიანტი იქნებოდა, რომ სასაუბრო მაგიდასთან რაღაც შეთანხმება შემდგარიყო, მაგრამ რანაირად უნდა დარჩე ამ მაგიდასთან, როცა მაგიდის წევრებს გიპატიმრებენ?! რანაირადაა ეს შესაძლებელი, როცა მოლაპარაკების სუბიექტები მაგიდასთან ფაქტობრივად ბორკილებში სხედან?!“ - განაცხადა მარგველაშვილმა.

იხილეთ ვიდეო

მარკო მიკელსონი - საქართველომ ყურადღების მოსაპოვებლად უნდა იბრძოლოს - პატარა ქვეყნები იმაზე დიდები უნდა ვიყოთ, ვიდრე ფიზიკურად ვართ
ქართული პრესის მიმოხილვა 25.02.2020
ირაკლი მელაშვილი - ვფიქრობ, საარჩევნო სისტემასთან დაკავშირებით არსებულ  ფონზე ხელისუფლებას გაუჭირდება ოპოზიციისთვის მოლაპარაკებების ჩაშლის გადაბრალება
როგორ დავაჩქაროთ მდგრადი განვითარების მიზნების განხორციელება აზიასა და წყნარ ოკეანეთში