სადაზღვევო კომპანია „ალდაგის“ მხარდაჭერით და „ბენე ექსკლუზივის“ ხელმძღვანელობით, ყოველწლიური მასშტაბური ღონისძიება „დისტრიბუციისა და ლოჯისტიკის ფორუმი“ ჩამოყალიბდა. ამის შესახებ „ინტერპრესნიუსს“ კომპანია „ალდაგიდან“ აცნობეს.
მათი ინფორმაციით, ფორუმის ფარგლებში დისტრიბუტორთა ბიზნეს ასოციაციასა და ბენე ჯგუფს შორის ურთიერთთანამშრომლობის მემორანდუმი გაფორმდა.
შეხვედრის მიზანი არაფორმალურ გარემოში დარგის წევრების შეკრება, ინფორმაციის გაზიარება და სიახლეების გაცნობა იყო. შეხვედრაზე გამომსვლელებმა საქართველოს ლოჯისტიკის ჰაბად ჩამოყალიბების პოტენციალზე და ამ პროცესში სახელმწიფოსა და კერძო სექტორის ჩართულობაზე ისაუბრეს.
შეხვედრის მთავარი მიზანი საქართველოს ლოჯისტიკური ცენტრის შექმნის ინიცირება და გაერთიანებული ძალებით დარგში არსებული აქტუალური საკითხების განხილვა იყო.
ფორუმი ეხებოდა დისტრიბუციისა და ლოჯისტიკის სფეროში მიმდინარე ტენდენციებს, სიახლეების გაცნობასა და დარგში არსებულ გამოწვევებს. ღონისძიება პანელური დისკუსიების ფორმატში მიმდინარეობდა. აღნიშნულ დისკუსიებში მონაწილეობას იღებდა სადაზღვევო კომპანია ალდაგის წარმომადგენელიც, რომელმაც წარადგინა კორპორატიული სექტორი და ისაუბრა ბაზარზე არსებულ ახალ პროდუქტზე - „სავაჭრო კრედიტების დაზღვევა’’.
ღონისძიება 2020 წლის 8 თებერვალსკოჯორში, "ბიოლველნესში" გაიმართა და მას ესწრებოდნენ როგორც სამთავრობო, ასევე კერძო სექტორის წარმომადგენლები.