პროფესიული საგანმანათლებლო დაწესებულებების ავტორიზაციის ახალი სტანდარტები დამტკიცდა

პროფესიული საგანმანათლებლო დაწესებულებების ავტორიზაციის ახალი სტანდარტები კანონის „პროფესიული განათლების შესახებ" შესაბამისად მომზადდა და პროფესიული განათლების ხარისხის უზრუნველყოფის ევროპულ ჩარჩოს დაეფუძნა, რაც ევროკავშირთან ასოცირების შეთანხმებით არის გათვალისწინებული. ამის შესახებ „ინტერპრესნიუსს“ „განათლების ხარისხის ეროვნული ცენტრიდან“ აცნობეს.

მათი ინფორმაციით, ახალი სტანდარტების საფუძველზე, დაწესებულების ადამიანურ და მატერიალურ რესურსთან ერთად, შეფასდება კოლეჯის სტრატეგიული ხედვა, სტუდენტუი სერვისები, საინფორმაციო და ფინანსური რესურსები, მეტი აქცენტი გაკეთდება პროგრამის ხარისხზე.

უწყების ცნობით, ექსპერტთა მხრიდან დაწესებულების შეფასების მიდგომა და პროცედურა კოლეჯის განვითარებაზე ორიენტირებული ხდება. ნაცვლად ხისტი, ორდონიანი შეფასებისა, ინერგება მოქნილი და კოლეჯის განვითარებაზე ორიენტირებული ოთხდონიანი შეფასების სისტემა, რაც სტანდარტებთან ნაწილობრივ ან მეტწილ შესაბამისობასაც ითვალისწინებს.

„კანონის მოთხოვნათა შესაბამისად, ავტორიზაციის დებულება მთლიანად გადამუშავდა პროფესიული განათლების ნაწილში და, სხვა მნიშვნელოვან სიახლეებთან ერთად, გაითვალისწინა პროფესიულ განათლებაში ზოგადსაგანმანათლებლო კომპონენტის ინტეგრირების შესაძლებლობა. შედეგად, კოლეჯებს უკვე შეუძლიათ ცენტრს მიმართონ საშუალო პროფესიული პროგრამების ავტორიზაციისთვის და საბაზო განათლების (მე-9 კლასი) მქონე სტუდენტებს, პროფესიის შესწავლასთან ერთად, სრული ზოგადი განათლებაც მიაწოდონ.

აღნიშნული ცვლილებები წელიწადნახევრის განმავლობაში მზადდებოდა და მასში ყველა დაინტერესებული მხარის ჩართულობა იყო უზრუნველყოფილი. პროცესში მონაწილეობდნენ პროფესიული საგანმანათლებლო დაწესებულებების, ავტორიზაციის საბჭოების, ავტორიზაციის ექსპერტთა კორპუსის, არასამთავრობო და დონორი ორგანიზაციების წარმომადგენლები და საერთაშორისო ექსპერტები.

განათლების სამინისტროს და გაეროს განვითარების პროგრამის მხარდაჭერით, ცენტრი გეგმავს მნიშვნელოვან ღონისძიებებს ავტორიზაციის ახალი სტანდარტების დანერგვის, საგანმანათლებლო დაწესებულებების შესაძლებლობების გაძლიერების, ასევე, ავტორიზაციის ექსპერტთა სერტიფიცირების მიმართულებით“,-ნათქვამია ინფორმაციაში.

ვიქტორ ყიფიანი - ევროკავშირი საქართველოს  რეგიონში მთავარ პარტნიორად მიიჩნევს და აღნიშნავს, რომ საქართველო სრულადაა ჩართული „აღმოსავლეთ პარტნიორობის“  მრავალმხრიან  არქიტექტურაში
ქართული პრესის მიმოხილვა 21.02.2020
ზაალ ანჯაფარიძე - საარჩევნო სისტემაზე ხელისუფლებასთან მოლაპარაკებებზე შეიძლება წამოვიდნენ ის პარტიები, რომლებსაც „ნაციონალების“ წინაშე რაიმე ვალდებულებები არ გააჩნიათ
სტუდენტზე ორიენტაცია, მოტივაციის ზრდა და კვალიფიკაციის ამაღლება - სტუ-ის რექტორის მიზნები და გეგმები
„მეტი ქართული პროდუქტის“ ინიციატივა „ვენდისთვის“ წარმატებული აღმოჩნდა
„ტერაბანკმა“ იურიდიული პირებისთვის მობაილბანკი შექმნა