ევროპელმა დიპლომატმა გულდაწყვეტით მითხრა, ევროპარლამენტის დღევანდელი გადაწყვეტილებით, მითი, ქართული დემოკრატიის და რეგიონში ლიდერი ქვეყნის თაობაზე დასრულდა, -ამის შესახებ "ნაციონალური მოძრაობის" წევრი, პარლამენტის დეპუტატი სალომე სამადაშვილი სოციალურ ქსელში წერს.

სალომე სამადაშვილის განცხადებით, მას ევროპელმა დიპლომატმა უთხრა, რომ საქართველოც ავტოკრატიულ პოსტ-საბჭოთა სივრცეში გადავიდა.

"ევროპელმა დიპლომატმა გულდაწყვეტით მითხრა, ევროპარლამენტის დღევანდელი გადაწყვეტილებით, მითი, ქართული დემოკრატიის და რეგიონში ლიდერი ქვეყნის თაობაზე დასრულდა, თქვენც ავტოკრატიულ პოსტ-საბჭოთა სივრცეში გადახვედითო. იმედია დროებითო-დააყოლა. ევროპა, ისევე როგორც ქართველი ხალხი, დაჟანგებული რეჟიმის დასასრულს ელოდება. უკეთესს ვიმსახურებთ!"-დაწერა სალომე სამადაშვილმა სოციალურ ქსელში.

შეგახსენებთ, რომ დღეს ოპოზიციონერმა დეპუტატებმა განაცხადეს, რომ ევროპარლამენტმა „ოცნების“ მომზადებული განცხადების პროექტი ჩააგდო. როგორც „ევროპული საქართველოს“ წევრი ოთარ კახიძე აცხადებს, „ეს არის უპრეცედენტო შემთხვევა და „ქართული ოცნების“ სრული კრახი“.