რა გადაწყვეტილებასაც საკონსტიტუციო სასამართლო მიიღებს, იმას დავემორჩილებით, - ასე გამოეხმაურა ჟურნალისტებთან საუბრისას საპარლამენტო უმრავლესობის ლიდერი მამუკა მდინარაძე ნიკა მელიას მიერ საკონსტიტუციო სასამართლოში სარჩელის შეტანას.
მისივე თქმით, მმართველი პარტია კანონის შესაბამისად იმოქმედებს.
„დაველოდოთ საკონსტიტუციო სასამართლოს გადაწყვეტილებას. ჩვენ მივიღეთ რაღაც გადაწყვეტილება და ვფიქრობთ, რომ ეს გადაწყვეტილება იყო სწორი. ახლა დაველოდოთ საკონსტიტუციო სასამართლოს გადაწყვეტილებას და შემდეგ ვიმსჯელოთ. კანონმდებლობაში უამრავი შემთხვევა ფიქსირდება, მათ შორის კომპენსაციებისა და სხვადასხვა უფლებებში აღდგენის თვალსაზრისით. ბუნებრივია, თუ ამგვარი გადაწყვეტილება იქნება, კანონით მოვიქცევით და კანონით მოვიქეცით წინა შემთხვევაში. რაიმე განსაკუთრებული აქ არ არის“, - განაცხადა მდინარაძემ.
შეგახსენებთ, საკონსტიტუციო სასამართლოში ნიკა მელიას სარჩელი საქართველოს პარლამენტის წინააღმდეგ განიხილება. ნიკა მელია დეპუტატის უფლებამოსილების ვადაზე ადრე შეწყვეტას ასაჩივრებს.