დავით ზალკალიანმა ინდოელ კოლეგას ანიტა ფაცაციას სიცოცხლის შესანარჩუნებლად ინდური მხარის მიერ გაწეული ძალისხმევისთვის მადლობა გადაუხადა

მიუნხენის საერთაშორისო უსაფრთხოების კონფერენციის ფარგლებში საქართველოს საგარეო საქმეთა მინისტრმა დავით ზალკალიანმა შეხვედრა გამართა ინდოეთის რესპუბლიკის საგარეო საქმეთა მინისტრთან სუბრაჰმანიამ ჯაიშანკართან. ამის შესახებ „ინტერპრესნიუსს“ უწყების პრესსამსახურიდან აცნობეს.

მათი ცნობით, შეხვედრის დასაწყისში საგარეო უწყების ხელმძღვანელმა მადლობა გადაუხადა ინდურ მხარეს ანიტა ფაცაციას მიმართ გამოხატული თანადგომის და ინდოელი მედიკოსებისა და მეცენატების მხრიდან ანიტას სიცოცხლის შესანარჩუნებლად გაწეული ძალისხმევისთვის.

„თავის მხრივ, ინდოეთის საგარეო უწყების ხელმძღვანელმა ქართველ კოლეგასთან მწუხარება გამოხატა პატარა ანიტას გარდაცვალების გამო.

მინისტრებმა ისაუბრეს ინდოეთსა და საქართველოს შორის დინამიურად მზარდი თანამშრომლობის შესახებ და სხვადასხვა სფეროში ურთიერთობების გაღრმავების მიზნით მჭიდრო და აქტიურ კომუნიკაციაზე შეთანხმდნენ. განსაკუთრებით ხაზი გაესვა ინდოეთთან, როგორც ეკონომიკის სფეროში მსოფლიოს ერთ-ერთ წამყვან ქვეყანასთან, სავაჭრო-ეკონომიკური ურთიერთობების გააქტიურების მნიშვნელობას. ამ მხრივ, დავით ზალკალიანმა კოლეგას ინფორმაცია მიაწოდა საქართველოს მთავრობის ეკონომიკურ პოლიტიკაზე და იმ მნიშვნელოვან რეფორმებზე, რომლებიც განხორციელდა ქვეყნის საინვესტიციო გარემოს გაუმჯობესების, სატრანზიტო პოტენციალის გაზრდისა და მსოფლოს წამყვან ბაზრებთან საქართველოს ეფექტიანი პოზიციონირებისთვის. დავით ზალკალიანმა ხაზი გაუსვა საერთაშორისო ფინანსური ორგანიზაციების რეიტინგებში საქართველოს მაღალ შეფასებებს და ასევე, იმ დადებით შეფასებებსა და პროგნოზებს, რასაც ქვეყნის ეკონომიკური მაჩვენებლის ზრდის შესახებ აკეთებენ მსოფლიოს ფინანსური ინსტიტუტები.

შეხვედრაზე საუბარი ასევე შეეხო რეგიონალური უსაფრთხოების თემებს. მინისტრმა ინდოელ კოლეგას ინფორმაცია მიაწოდა ქვეყნის სამშვიდობო პოლიტიკის შესახებ, ასევე ბოლო ოკუპირებულ რეგიონებში ბოლო პერიოდში განვითარებულ მოვლენებზე.

დავით ზალკალიანმა მადლობა გადაუხადა ინდურ მხარეს საქართველოს სუვერენიტეტისა და ტერიტორიული მთლიანობის მხარდაჭერისთვის. დადებითი შეფასება მიეცა ინდოეთთან კულტურული და ხალხთაშორისი ურთიერთობების მაღალ დონეს, თანამშრომლობას განათლების და ტურიზმის სფეროში“, - ნათქვამია გავრცელებულ ინფორმაციაში.

საქართველოს საგარეო საქმეთა მინისტრი ვიზიტით გერმანიის ფედერაციულ რესპუბლიკაში იმყოფება, სადაც მონაწილეობს 14-15 თებერვალს მიმდინარე მიუნხენის საერთაშორისო უსაფრთხოების 56-ე კონფერენციაში.

მარკო მიკელსონი - საქართველომ ყურადღების მოსაპოვებლად უნდა იბრძოლოს - პატარა ქვეყნები იმაზე დიდები უნდა ვიყოთ, ვიდრე ფიზიკურად ვართ
ქართული პრესის მიმოხილვა 26.02.2020
ირაკლი მელაშვილი - ვფიქრობ, საარჩევნო სისტემასთან დაკავშირებით არსებულ  ფონზე ხელისუფლებას გაუჭირდება ოპოზიციისთვის მოლაპარაკებების ჩაშლის გადაბრალება
როგორ დავაჩქაროთ მდგრადი განვითარების მიზნების განხორციელება აზიასა და წყნარ ოკეანეთში
BDO-მ ინფორმაციული უსაფრთხოების საერთაშორისო სტანდარტის ISO/IEC 27001 სერტიფიცირება გაიარა