მე მრცხვენოდა სხვის მაგივრად , - ასე შეაფასა იურიდიულ საკითხთა კომიტეტის სხდომაზე მომხდარი ინციდენტი საპარლამენტო უმრავლესობის ლიდერმა მამუკა მდინარაძემ. მისივე თქმით, საპარლამენტო ოპოზიციის წარმომადენლების ქმედების ამსახველ კადრებს შეიძლება დაეწეროს სიტყვა "უკომენტაროდ".
„ხომ გქონიათ ყველას მომენტი როცა გრცხვენიათ სხვისი მოქმედების?! ეს მომენტი მქონდა მე მაგალითად. სახის დაკარგვის კონკრეტული მაგალითები ბევრი ვნახეთ, მაგრამ ეს ერთ- ერთი განსაკუთრებული იყო. მე მრცხვენოდა სხვის ნაცვლად და სხვები იყვნენ ეს ქალბატონები, ვინც ეს პერფორმანსი დადგა. „უკომენტაროდ” შეიძლება დაეწეროს ამ კადრებს", - განაცხადა მდინარაძემ.
მისივე თქმით, უმრავლესობაც და საპარლამენტო ოპოზიციასაც, ვინც სხდომას ესწრება, უამრავ კითხვას დასვამს.
"მე პირადად მაქვს შეკითხვა გაძლიერდება თუ არა ის დეპარტამენტი, რომელიც იძიებს სამართალწარმოების პროცესში ჩადენილ დანაშაულებს. მე მგონია საკმარისი არაა გენერალურ პროკურატურაში, მაგალითად, გამომძიებლების ის რაოდენობა, რომლებიც იძიებენ საქმეებს სამართლიანობის აღდგენასთან დაკავშირებით", - განაცხადა მდინარაძემ.
შეგახსენებთ, რომ იურიდიულ საკითხთა კომიტეტის სხდომაზე, სადაც გენერალური პროკურორობის კანდიდატის ირაკლი შოთაძის მოსმენა უნდა დაწყებულიყო, „ევროპული საქართველოს“ წევრი ელენე ხოშტარია და „ნაციონალური მოძრაობის“ წევრი თინა ბოკუჩავა მივიდნენ. ელენე ხოშტარიას და თინა ბოკუჩავას ბიძინა ივანიშვილის გამოსახულებიანი ნიღაბი ეკეთათ. ისინი ირაკლი შოთაძესთან მივიდნენ, რასაც კომიტეტის სხდომაზე ხმაური მოჰყვა.