გუდაურში მომხდარი მკვლელობის საქმეზე დაკავებულისთვის აღკვეთის ღონისძიების შეფარდებაზე მსჯელობა მცხეთაში, საავადმყოფოში მიმდინარეობს
გუდაურში მომხდარი მკვლელობის საქმეზე დაკავებულს განზრახ მკვლელობის და ორი ან მეტი პირის მკვლელობის მცდელობის მუხლით ბრალი წარედგინა. ამის შესახებ „ინტერპრესნიუსს“ ბრალდებულს ადვოკატმა, ტარიელ კაკაბაძემ განუცხადა.
კითხვაზე, ხომ არ დააყენებს ბრალდების გადაკვალიფიცირების შუამდგომლობას, ადვოკატმა განაცხადა, რომ კიდევ რაღაცას ელოდებიან და გადაწყვეტენ.
მისივე ინფორმაციით, დაცვის მხარის ძირითად მტკიცებულებებს ჯერჯერობით ფაქტის ამსახველი მხოლოდ ორი ვიდეო-ჩანაწერი წარმოადგენს.
„მეტი მტკიცებულება ჯერ საქმეში არ დევს, მაგრამ ჩაიდება აუცილებლად კიდევ. თვითონ ფაქტის ამსახველი მტკიცებულებები ძირითადად ეს ორი ვიდეოა“,- განაცხადა კაკაბაძემ.
დაკავებულისთვის აღკვეთის ღონისძიების შეფარდების თაობაზე მსჯელობა მცხეთაში, საავადმყოფოში მიმდინარეობს.
შეგახსენებთ, რომ ადვოკატმა „ინტერპრესნიუსს“ გუშინ განუცხადა, თავად ბრალდებულიც დაშავებულია.
ცნობისთვის, კვირას, გუდაურში ერთი ახალგაზრდა მამაკაცი მოკლეს, ერთი კი დაჭრეს.
