„ევროპული საქართველოს“ ერთ-ერთი ლიდერი სერგი კაპანაძე აცხადებს, რომ არცერთი სერიოზული ოპოზიციური ძალა „ქართულ ოცნებასთან“ დიალოგზე არ წავა.
კაპანაძე გამოეხმაურა „ქართული ოცნების“ გენერალური მდივნის, კახა კალაძის განცხადებას, რომ მმართველი პარტია მზადაა სხვადასხვა პარტიასთან ცალკეული შეხვედრებისა და საარჩევნო სისტემაზე მსჯელობისთვის. კაპანაძის თქმით, დიალოგი გიგი უგულავას დაკავებით დამთავრდა.
„როგორც ჩანს, ახალი, ბისმარკისეული სტრატეგია მოიგონეს ახლა, რომ „დაყავი და იბატონეო“. არანაირი სეპარატული მოლაპარაკებები კალაძესთან და „ქართულ ოცნებასთან“ არ იქნება. დიალოგი იმ ამოცანით და იმ მიზნით მიმდინარეობდა, რომ პროპორციულ სისტემაზე შევთანხმებულიყავით, მაგრამ მათ უარი თქვეს დიალოგზე და დაიწყეს ოპოზიციური ლიდერების დაჭერა, შესაბამისად, დიალოგი დამთავრდა მათი ამ ნაბიჯით. ამიტომ, ახლა რას ამბობენ, ვისთან საუბარი უნდათ, ჩემთვის სრულიად გაუგებარია და მოლოდინი მაქვს, რომ სერიოზული ოპოზიციური ძალა ამ დიალოგზე არ წავა“, - აღნიშნა კაპანაძემ კალაძის განცხადების კომენტირებისას.