ისრაელის იუსტიციის სამინისტროს ინფორმაციით, ქვეყნის პრემიერ-მინისტრის, ბენიამინ ნეთანიაჰუს წინააღმდეგ კორუფციის საქმეზე სასამართლო საქმის განხილვა 17 მარტს დაიწყება. სამინისტროს განცხადებაში ნათქვამია, რომ ნეთანიაჰუ იერუსალიმის საოლქო სასამართლოში პირველ სხდომას უნდა დაესწროს, სადაც ბრალდებას გააცნობენ. საქმეს სამი მოსამართლისგან შემდგარი კოლეგია განიხილავს.

ნეთანიაჰუ პირველი პრემიერია ქვეყნის ისტორიაში, რომელიც სასამართლოს წინაშე წარდგება. მას სამ საქმეზე ედება ბრალი, მათ შორის არის მექრთამეობა, ნდობის ბოროტად გამოყენება და თაღლითობა. პრემიერი ყველა ბრალდებას უარყოფს.

ბრალის დამტკიცების შემთხვევაში ნეთანიაჰუს 10 წლამდე პატიმრობა ემუქრება მექრთამეობისთვის, ხოლო მაქსიმუმ სამი წელი თაღლითობისა და ნდობის ბოროტად გამოყენებისთვის. ორი კვირით ადრე კი, 2 მარტს ქვეყანაში მესამე რიგგარეშე საპარლამენტო არჩევნებია დანიშნული.