ვფიქრობ, რომ ვანო მერაბიშვილი აქტიურ პოლიტიკურ მოღვაწეობას შეუდგება. მერაბიშვილის პოლიტიკაში ჩართვა არის მხოლოდ მისი და იმ მხარდამჭერების გადასაწყვეტი, რომელიც, სავარაუდოდ, ბატონ ვანოს მრავლად ჰყავს საქართველოში,- ამის შესახებ „ევროპული საქართველოს“ წევრმა აკაკი ბობოხიძემ განაცხადა, რითაც ვანო მერაბიშვილის სამომავლო გეგმებთან დაკავშირებით ჟურნალისტების კითხვას უპასუხა.

რაც შეეხება იმას, ხომ არაა მოსალოდნელი, რომ მერაბიშვილი საპატიმროდან გამოსვლის შემდეგ კიდევ დააკავონ, ბობოხიძემ განაცხადა, რომ „ბიძინა ივანიშვილისგან ყველაფერია მოსალოდნელი“.

„ივანიშვილი ცივილური მეთოდებით არჩევნებს ვერ იგებს, ამიტომ დარჩა ერთადერთი შანსი, ყველაფერი გააკეთოს, მათ შორის სრულიად არაბუნებრივი გადაწყვეტილებები მიიღოს.

ამიტომ, ყველა პროცესი - კარგი თუ ცუდი, „ქართული ოცნების” მხრიდან დაწყებული, დასრულდება უახლოეს საპარლამენტო არჩევნებზე”,- განაცხადა ბობოხიძემ.

შეგახსენებთ, შინაგან საქმეთა ყოფილი მინისტრი, მსჯავრდებული ვანო მერაბიშვილი თითქმის 7-წლიანი პატიმრობის შემდეგ, პენიტენციურ დაწესებულებას, ე.წ. მატროსოვის ციხეს ხვალ, 20 თებერვალს დატოვებს. მერაბიშვილს პატიმრობის ვადა სწორედ ამ დღეს ეწურება.