"ევროპული საქართველოს" ერთ-ერთი ლიდერი სერგი კაპანაძე თბილისის ყოფილ მერს, "ქართული ოცნება-დემოკრატიული საქართველოს" გენერალურ მდივანს კახა კალაძეს სოციალურ ქსელ "ტვიტერზე" პასუხობს. სერგი კაპანაძემ კახა კალაძეს იმ "ტვიტზე" უპასუხა, სადაც თბილისის მერმა ოპოზიციასთან მოლაპარაკებებისთვის მზაობასთან დაკავშირებით დაწერა და საერთაშორისო პარტნიორები მონიშნა.

"ოპოზიციის ლიდერები კვლავ ციხეში არიან, სხვების წინააღმდეგ ჯერ კიდევ მიმდინარეობს საქმეები და ჩვენ არ მოგვისმენია წინადადება, რომელიც საქართველოს პროპორციულ (ან მის მახლობელ სისტემას) სისტემას მოუტანს. ქართული ოცნება კვლავ იმ აზრზეა, რომ 30%-იანი მხარდაჭერით უნდა მართოს ქვეყანა.ჩანს რამდენად გულწრფელია შეთავაზება :) ",-წერს სერგი კაპანაძე.

ცნობისთვის, კახა კალაძემ სოციალურ ქსელში განცხადება გამოაქვეყნა, რომელშიც ნათქვამია, რომ "ქართული ოცნება" მზად არის მოლაპარაკებები გამართოს ოპოზიციასთან, რათა შეთანხმდეს ყველაზე გონივრულ საარჩევნო სისტემაზე.

მან საკუთარ "ტვიტზე" ევროპარლამენტი, სოციალისტთა და დემოკრატთა ჯგუფი, ევროპის სახალხო პარტია, კონგრესმენი ადამ კინზინგერი და სენატორი ჯიმ რიში მონიშნა.

"პარტია “ქართული ოცნება“ მზად არის მოლაპარაკებები გამართოს ოპოზიციასთან, რათა შეთანხმდეს ყველაზე გონივრულ საარჩევნო სისტემაზე 2020 წლის საპარლამენტო არჩევნებისთვის",-წერს კალაძე "ტვიტერზე" .