ქართველი მეზღვაურების ტყვეობიდან უსაფრთხოდ გათავისუფლებაზე აქტიურად ვმუშაობთ,- ამის შესახებ "ინტერპრესნიუსს" საზღვაო ტრანსპორტის სააგენტოში განუცხადეს. უწყების ინფორმაციით, ქართველი მეზღვაურების ოჯახს საზღვაო ტრანსპორტის სააგენტო მუდმივ ინფორმაციას მიაწვდის.

„მიმდინარე წლის 20 თებერვალს ადგილობრივი დროით 01:10 საათზე შეიარაღებული პირები თავს დაესხნენ ლიბერიის დროშის ქვეშ მცურავ ტანკერს. თავდასხმის დროს გატაცებულია 10 მეზღვაური, მათ შორის საქართველოს 4 მოქალაქეა. აქტიურ კომუნიკაციაზე ვართ გემთმფლობელ კომპანიასთან, რომელიც კარგი რეპუტაციის მქონეა, პასუხისმგებლიანია და ყველა შესაბამის ღონისძიებას ატარებს. ქართველი მეზღვაურების უსაფრთხოებიდან გამომდინარე, მოგიწოდებთ, არ გავრცელდეს მედიის საშუალებით მაიდენტიფიცირებელი ინფორმაცია. საქართველოს ეკონომიკისა და მდგრადი განვითარების სამინისტროს საზღვაო ტანსპორტის სააგენტო და საგარეო საქმეთა სამინისტრო ერთობლივად მუშაობენ გემთმფლობელთან, ყველა შესაძლო გზით ქართველი მეზღვაურების ტყვეობიდან უსაფრთხოდ დასახსნელად. ოჯახები ინფორმირებულია და საზღვაო ტრანსპორტის სააგენტო თითოეულს მიაწვდის განახლებულ ინფორმაციას",- აცხადებენ უწყებაში.