თბილისის მერის, პარტია „ქართული ოცნების“ გენერალური მდივნის კახა კალაძის განცხადებით, გიგი უგულავას დაკავებასთან საარჩევნო წელს არანაირი კავშირი არ აქვს და მისი პოლიტპატიმრად შერაცხვა უხერხულია.
„უგულავას საქმე 2013-2014 წელს იყო დაწყებული, შემდეგ მას მიესაჯა. შემდეგ პროკურატურას ჰქონდა გასაჩივრებული და უზენაესმა სასამართლომ მიიღო გადაწყვეტილება. გიგი უგულავას პოლიტპატიმრად შერაცხვა უხერხულია. უხერხულია იმ თვალსაზრისით, რომ ადამიანმა 50 მილიონ ლარამდე მოიპარა. შესაბამისად, როდესაც დანაშაულს ჩადიხარ, კანონის წინაშე ყველა თანასწორები ვართ“, - განაცხადა კახა კალაძემ.
ამასთან, კალაძემ ვანო მერაბიშვილზეც ისაუბრა და განმარტა, რომ ის სასჯელს კონკრეტული დანაშაულისთვის იხდიდა და პოლიტპატიმრობასთან არანაირი კავშირი არ აქვს.
„მერაბიშვილი სასჯელს იხდიდა იმ კონკრეტული დანაშაულების ჩადენის გამო, რომლის მტკიცებულებები უამრავი არსებობს. მას პოლიტპატიმრობასთან არანაირი კავშირი არ აქვს”, - განაცხადა კალაძემ.