პარტია „ევროპული საქართველოს“ ოფისთან სამოქალაქო აქტივისტებმა აქცია გამართეს. აქციის მონაწილეები პარლამენტში საბჭოთა კავშირის ჰიმნის გაჟღერებას აპროტესტებდნენ და „ევროპული საქართველოს“ დეპუტატების ელენე ხოშტარიასა და ირმა ნადირაშვილისათვის დეპუტატის მანდატის შეჩერებას ითხოვდნენ.

აქციის მონაწილეებმა ოფისთან სტიკერები წარწერით „სიტყვით ევროპელები, საქმით ოკუპანტები“ გააკრეს და სიმბოლურად ელენე ხოშტარიასა და ირმა ნადირაშვილისთვის მიტანილი სიგელი დაწვეს.

„ჩვენი მოთხოვნაა ელენე ხოშტარიამ და ირმა ნადირაშვილმა დატოვოს საქართველოს პარლამენტის მანდატი. ვფიქრობთ, რომ თუ თავს იმართლებენ, რომ ეს პერფორმანსი იყო, პერფორმანსი არის პროექტი, რომელსაც აქვს თავისი ჩარჩოები, ყველანაირი ეთიკის ნორმებს ეწინააღმდეგება მსგავსი ტიპის პერფორმანსი, - განაცხადა აქციის ერთ-ერთმა მონაწილემ ნათია კონცელიძემ.