მოძრაობა „შეცვალემ” არჩილ ტატუნაშვილის გარდაცვალებიდან ორ წლისთავთან დაკავშირებით, შვეიცარიის საელჩოსთან, სადაც რუსეთის ინტერესების სექცია მდებარეობს, მდუმარე აქცია გამართა. მათ საელჩოს წინ სანთლები დაანთეს, ფრანები გაუშვეს და ტატუნაშვილის ხსოვნას პატივი მიაგეს.

„პირველ რიგში, ეს არის მადლობის გადახდა არჩილ ტატუნაშვილისთვის. ამ ადამიანმა ის უძვირფასესი რამ გაიღო, რასაც სიცოცხლე ჰქვია, საკუთარი იდეებისთვის და ეს იდეა იყო ერთიანი, ძლიერი საქართველო და ეს იქნება ჩვენი მადლობის გამოხატვა და გადახდა მისთვის. მეორე საკითხი, რაც მნიშვნელოვანი იქნება არის ის, რომ ჩვენ არ დავივიწყებთ იმას, რომ საქართველო არის ოკუპირებული და მგონია, რომ ყველაფერი უნდა გავაკეთოთ იმისთვის, რომ საქართველოს დეოკუპაციის საკითხი დაბრუნდეს უმაღლეს ტრიბუნებზე მსოფლიოს მასშტაბით. ეს იქნება ჩვენი სურვილი და ამას აუცილებლად მივაღწევთ”, - განაცხადა მოძრაობის აქტივისტმა გიორგი კუპატაძემ.