იუსტიციის უმაღლესი საბჭოს მდივნის, გიორგი მიქაუტაძის განცხადებით, იუსტიციის უმაღლეს საბჭოს ობიექტური მიზეზები ჰქონდა, რის გამოც დამოუკიდებელი ინსპექტორის სამსახურში შესული მოსამართლეთა დისციპლინური საქმეები საბჭომ ვერ განიხილა.

გიორგი მიქაუტაძის თქმით, გასულ წელს იუსტიციის უმაღლესი საბჭო იყო დატვირთული, ამასთან, დისციპლინურ სამართალწარმოებასთან დაკავშირებით რეფორმა ტარდებოდა. შესაბამისად, მისივე თქმით, საბჭოს ჰქონდა ობიექტური მიზეზები, რის გამოც გაჭიანურდა საქმეების განხილვა.

„გარკვეული პერიოდი გავიდა მას შემდეგ, რაც იუსტიციის უმაღლეს საბჭოს არ ჩაუტარებია დისციპლინური საქმეების განხილვის სხდომები, თუმცა ამას თავისი ობიექტური მიზეზები აქვს. უკვე რამდენიმე წელია მიმდინარეობს რეფორმა, რომელიც ეხებოდა დისციპლინურ სამართალწარმოებას და ზოგადად, სასამართლოს ანგარიშვალდებულებას. სრულად განახლებულია დისციპლინური პასუხისმგებლობის საფუძვლები, ისე, როგორც პროცედურები. ამ პროცესში ჩვენ მივიღეთ დამოუკიდებელი ინსპექტორის ინსტიტუტი და ძირითადი ნაწილი ამ საკანონმდებლო ცვლილებებისა, რომელიც შეეხო დისციპლინურ წარმოებას, ამოქმედდა პირველი იანვრიდან. შესაბამისად, ვგეგმავთ, რომ უახლოეს პერიოდში განვაახლებთ იუსტიციის საბჭოში დისციპლინური საქმეების განხილვას. გვექნება კონკრეტული შედეგები“, - განაცხადა მიქაუტაძემ.

იუსტიციის უმაღლესი საბჭოს დამოუკიდებელმა ინსპექტორმა 2019 წლის ანგარიში წარადგინა.