კახა კალაძე - გაკვირვებას ვერ ვმალავ იმ აგრესიის გამო, რომელსაც ზოგიერთი პირი ჩვენი საამაყო სპორტსმენების მიმართ ავლენს

როგორც ქართული სპორტის გულშემატკივარი და ამ დიდი ოჯახის წევრი, გაკვირვებას ვერ ვმალავ იმ აგრესიის გამო, რომელსაც ზოგიერთი პირი ავლენს უკანასკნელ პერიოდში ჩვენი საამაყო სპორტსმენების მიმართ, - ამის შესახებ თბილისის მერი კახა კალაძე აცხადებს.

კალაძის განცხადებით, მისთვის სრულიად წარმოუდგენელია, კერძო ინტერესების გამო, როგორ შეიძლება ასეთი საზოგადო სიკეთის დაზიანება.

„პირველ რიგში, ვულოცავ საქართველოს ეროვნულ საკალათბურთო ნაკრებს სერბეთის უძლიერეს ნაკრებთან გამარჯვებას, ვულოცავ გურამ თუშიშვილსა და ტატო გრიგალაშვილს დუსელდორფის გრანდ სლემზე ოქროს მედალს და ჩვენს რაგბისტებს ბელგიის ეროვნული ნაკრების დიდი უპირატესობით, სანახაობრივი თამაშით, დამარცხებას. დღეს, ქართულ სპორტს, დამოუკიდებელი საქართველოს ისტორიაში უპრეცენდენტოდ დიდი წარმატება აქვს. ბოლო დღეებში მიღწეულ წარმატებებთან ერთად, აუცილებლად მინდა ვახსენო, ქართველი ფალავანის, გენო პეტრიაშვილის ოქროს მედალი, რომელიც ევროპის ჩემპიონატზე ზედიზედ მეორედ მოიპოვა, ჩვენი საამაყო ძალოსანი ლაშა ტალახაძე, რომელიც ყოველ ჯერზე ახალ რეკორდს ამყარებს, ასევე მთელს მსოფლიოს აოცებენ და საკუთარი წარმატებით გვახარებენ ჩვენი რაგბისტები, წარმატება გვაქვს წყალბურთში, კალათბურთში, ფეხბურთში და პრაქტიკულად სპორტის ყველა სახეობაში.

ამდენი ოქროს მედალი, ამდენი წარმატება ინდივიდუალურ, თუ გუნდურ სახეობებში, ჩვენზე ბევრად დიდი და ეკონომიკურად ძლიერი ქვეყნებისთვისაც სანატრელია. ჩვენი სპორტსმენები კი საკუთარი ენთუზიაზმის და თავგანწირვის ხარჯზე ახერხებენ საკუთარ ქვეყანას სახელი გაუთქვან და ომში დამარცხებულ ქვეყანას, სპორტული გამარჯვებები გვაზეიმონ. მე, როგორც ყოფილმა სპორტსმენმა ზუსტად ვიცი, რამხელა შრომა, რამხელა თავდადება დგას თითოეული გამარჯვების უკან და ისიც ზუსტად ვიცი, რომ თუ გწამს, თუ ძალისხმევას არ იშურებ, ბოლოს აუცილებლად გაიმარჯვებ“, - აცხადებს კალაძე.

მისივე თქმით, „ქვეყნისთვის საბოლოო, დიდი გამარჯვება სწორედ ასეთ, პატარ-პატარა გამარჯვებებს, სწორედ ასეთ ოქროს მედლებს, ასეთ ჩემპიონებს და გამარჯვების იმ დაუვიწყარ შეგრძნებას მოაქვს, რომელიც საკუთარი თავის, ხალხის და ქვეყნის რწმენას გიმყარებს“.

„ჩემი აზრით, სწორედ ასეთ დიდ საქმეს აკეთებენ ქვეყნისთვის ჩვენი საამაყო სპორტსმენები, ისინი უყრიან საფუძველს ჩვენი ქვეყნის დიდი გამარჯვებისთვის. ამ დიდი წარმატების ფონზე, მე როგორც ქართული სპორტის გულშემატკივარი და ამ დიდი ოჯახის წევრი, გაკვირვებას ვერ ვმალავ იმ აგრესიის გამო, რომელსაც ზოგიერთი პირი ავლენს უკანასკნელ პერიოდში ჩვენი საამაყო სპორტსმენების მიმართ.

ჩემთვის სრულიად წარმოუდგენელია, კერძო ინტერესების გამო, როგორ შეიძლება ასეთი საზოგადო სიკეთის დაზიანება; როგორ შეიძლება იმ ადამიანის შეურაცხყოფა, რომელმაც შენი ქვეყანა მსოფლიოში გამოარჩია, შენს ხალხს სიხარულისა და სიამაყის შეგრძნება მიანიჭა, გამარჯვების იმედი ჩაუნერგა.

რა თქმა უნდა, ხალხი ბრძენია და ეს მცდელობები, ჩვენს საამაყო სპორტსმენებს ჩრდილს ვერ მიაყენებს, მაგრამ ეს ჩრდილს აყენებს ჩვენს ურთიერთდამოკიდებულებას. ასეთი მიდგომებით აღარაფერი საერთო, აღარაფერი ხელშეუხებელი აღარ დაგვრჩება და ჩვენი ისედაც ტრავმირებული წარსული, შეიძლება კიდევ უფრო დავამძიმოთ“, - აცხადებს კალაძე.

მისივე თქმით, სპორტს პოლიტიკური კუთვნილება არ აქვს, ის ყველასია და დაუშვებელია, კერძო ინტერესების გამო, საამაყო სპორტსმენების, ოლიმპიური, მსოფლიო, თუ ევროპის ჩემპიონების დისკრედიტაციის მცდელობა.

“იმედი მაქვს, ეს ცალკეული, ფრაგმენტული გადაცდომებია და მსგავს განცხადებებს სხვა პოლიტიკოსთა მხრიდან მომავალში აღარ მოვისმენთ.

იმედი მაქვს სწორედ ამ ხალხის მიერ მონიჭებული სიხარულის განცდით შევძლებთ დავძლიოთ ყველა ბარიერი, დავამარცხოთ ყველა პრობლემა და ერთად მივიყვანოთ ქვეყანა საბოლოო გამარჯვებამდე! ჩემი მხარდაჭერა ყველა ქართველ სპორტსმენს და ქართულ სპორტს. ბევრი გამარჯვება ჩვენს ქვეყანას!“- აღნიშნულია კალაძის განცხადებაში, რომელსაც ის სოციალურ ქსელში აქვეყნებს.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
აკადემიკოსი გიორგი ჯაფარიძე - ქვეყანა რომ წარმოდგენილი იყოს მსოფლიოს სამეცნიერო რუკაზე, აუცილებელია მასში მცხოვრები მეცნიერები თავისი საქმიანობით მონაწილეობდნენ საერთაშორისო სამეცნიერო პროცესში
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს