პრაღაში მოედანს, სადაც რუსეთის საელჩოა განთავსებული, ბორის ნემცოვის სახელი მიენიჭება. ინფორმაციას ამის შესახებ ჩეხეთის მედია ავრცელებს. ასევე ცნობილი ხდება, რომ ერთ-ერთ პარკს ქალაქში, ანა პოლიტკოვსკაიას სახელი მიენიჭება.

„ორივე მათგანი დემოკრატიისთვის იბრძოდა და ორივე სამარცხვინოდ მოკლეს. ისინი იმსახურებენ რომ გვახსოვდეს“,-დაწერა პრაღის მერმა „ტვიტერის“ საკუთარ გვერდზე.

ბორის ნემცოვი, კრემლის ცნობილი კრიტიკოსი მოსკოვში 2015 წლის 27 თებერვალს მოკლეს. მას ზურგში რამდენჯერმე ესროლეს. რუსი ჟურნალისტი ანა პოლიტკოვსკაია, რომელიც აქტიურად აშუქებდა ჩეჩნეთის ომსა და ჩრდილოეთ კავკასიაში არსებულ ვითარებას, 2006 წლის 7 ოქტომბერს, ასევე მოსკოვში მოკლეს.