მას შემდეგ, რაც ფიგურალურად, მაგიდიდან ააცალეს სულ ყველას გიგი უგულავა და საფუძვლიანი ეჭვი არსებობს ოპოზიციაში, რომ ეს ბოლო დაპატიმრება არ არის, დიდი ბოდიში მომიხდია - რა დიალოგზე შეიძლება აქ ვილაპარაკოთ? - ასე უპასუხა პარტია „ნაციონალური მოძრაობის“ თავმჯდომარემ, გრიგოლ ვაშაძემ მმართველ გუნდსა და ოპოზიციას შორის დიალოგთან დაკავშირებულ კითხვას.

როგორც ვაშაძემ ჟურნალისტებს განუცხადა, მათი მოთხოვნაა პროპორციული არჩევნები, პოლიტიკური დევნის შეწყვეტა, საქმეების დახურვა და პოლიტიკური პატიმრების გათავისუფლება. მისივე თქმით, ამ ყველაფრის გარეშე ხელისუფლებასთან დიალოგი წარმოუდგენელია.

„ჩვენი პოზიცია ძალიან ბევრჯერ არის დაფიქსირებული. მე შემიძლია, მხოლოდ “ერთიანი ნაციონალური მოძრაობის” სახელით ვილაპარაკო. ჩვენი პოზიცია ძალიან ბევრჯერ არის დაფიქსირებული და ეს პოზიცია მდგომარეობს შემდეგში, და ეს პოზიცია ემთხვევა საქართველოს მოქალაქეების უმრავლესობის პოზიციას - პროპორციული არჩევნები, პოლიტიკური დევნის შეწყვეტა, საქმეების დახურვა და პოლიტიკური პატიმრების გათავისუფლება, ამის გარეშე ყოველგვარი დიალოგი წარმოუდგენელია. მორალურად ჩვენთვის ძალიან მძიმე იყო უკვე ამ დიალოგის დაწყება, მაგრამ მას შემდეგ, რაც ფიგურალურად, მაგიდიდან ააცალეს სულ ყველას გიგი უგულავა და საფუძვლიანი ეჭვი არსებობს ოპოზიციაში, რომ ეს ბოლო დაპატიმრება არ არის, დიდი ბოდიში მომიხდია - რა დიალოგზე შეიძლება აქ ვილაპარაკოთ?“ - განაცხადა ვაშაძემ.