განათლების, მეცნიერებისა და კულტურის კომიტეტმა საკანონმდებლო წინადადებას, რომელიც მსჯავრდებულებისთვის უმაღლესი განათლების სამივე საფეხურზე ( ბაკალავრიატი, მაგისტრატურა, დოქტორანტურა) სწავლის შესაძლებლობის მიცემას გულისხმობდა, მხარი არ დაუჭირა.

საკანონმდებლო წინადადების მიხედვით, რომლის ავტორიც მოქალაქე ალექსანდრე სელეპანოვია, თავისუფლების აღკვეთის ყველა დაწესებულებაში მყოფ სრულწლოვან მსჯავრდებულებს უმაღლესი განათლების სამივე საფეხურზე სწავლის, ხოლო არასრულწლოვნებს პირველ საფეხურზე (ბაკალავრიატი) სწავლის საშუალება ეძლევათ, განურჩევლად მათ მიერ ჩადენილი დანაშაულის სიმძიმისა.

როგორც საკანონმდებლო წინადადების ავტორი აღნიშნავს, უმაღლესი განათლების ორ საფეხურზე ( ბაკალავრიატი, მაგისტრატურა) სწავლის უფლებით სარგებლობენ მხოლოდ გარკვეულ დაწესებულებებში მყოფი მსჯავრდებულები. კერძოდ, ეს დაწესებულებებია: გათავისუფლებისთვის მომზადების დაწესებულება, დაბალი რისკის თავისუფლების აღკვეთის დაწესებულება და არასრულწლოვანთა სარეაბილიტაციო დაწესებულება.

ალექსანდრე სელეპანოვის განცხადებით, დღეს მოქმედი კანონმდებლობით, ქალთა სპეციალურ დაწესებულებაში, ნახევრად ღია და დახურული ტიპის, ასევე განსაკუთრებული რისკის თავისუფლების აღკვეთის დაწესებულებაში მოთავსებულ მსჯავრდებულებს არ ეძლევათ უმაღლესი განათლების მიღების უფლება.

"პატიმრობის კოდექსით, ბაკალავრიატის და მაგისტრატურის საფეხურებზე მსჯავრდებულს უმაღლესი განათლების მიღების უფლება ეძლევა მხოლოდ იმ მსჯავრდებულს, ვინც მოთავსებულია სამ დაწესებულებაში. ამ დაწესებულებებში იმყოფება მხოლოდ 300 მსჯავრდებული. სხვა დაწესებულებებში მყოფი მსჯავრდებულების რაოდენობა არის დაახლოებით 9 ათასი. ასეთი კანონისმიერი უფლება მათ არ გააჩნიათ. ასევე, არც ერთ ქალ მსჯავრდებულს, მათ შორის არასრულწლოვნებს, არ გააჩნია კანონისმიერი უფლება, მიიღოს უმაღლესი განათლება, რადგან ქალთა სპეციალური დაწესებულება არ შედის ამ სამ დაწესებულებათა შორის. პრობლემა იმაშია, რომ პრაქტიკამ ბევრად გაუსწრო კანონმდებლობას და მსჯავრდებულები იღებენ უმაღლეს განათლებას. პრობლემა იმაში მდგომარეობს, რომ ეს ადამიანები დაწესებულების კეთილ ნებაზე რჩებიან დამოკიდებული. გარდა ამისა, რაც შეეხება დოქტორანტურას, მსჯავრდებულებს კანონით სრულიად შეზღუდული აქვთ ამ საფეხურზე განათლების მიღების შესაძლებლობა“, - განაცხადა საკანონმდებლო წინადადების ავტორმა.