ვარკეთილში, “ანას ბაღის” მიმდებარე ტერიტორიაზე აქტივისტები და ადგილობრივი მოსახლეობა მიუხედავად მშენებელი კომპანიის წინააღმდეგობისა, ნარგავებს რგავენ. ადგილზე სამართალდამცველები არიან მობილიზებული.
ტერიტორიაზე ახლა სიმშვიდეა. როგორც ერთ-ერთმა აქტივისტმა “ინტერპრესნიუსთან” განაცხადა, მათ “ანას ბაღთან” პარტიზანული სკვერი მოაწყვეს, რომელიც მშენებელმა კომპანიამ დაარბია და გაანადგურა. მისი თქმით, მათ ბოძები მოგლიჯეს და ახლა ამ ალტერნატიული სკვერის აღდგენას აპირებენ.
ცნობისთვის, ადგილზე ბოლო ერთი საათის განმავლობაში რამდენიმე ინციდენტი მოხდა. ერთმანეთს კომპანიის წარმომადგენლები და ადგილობრივი მოსახლეობა სიტყვიერად დაუპირისპირდა. ერთ-ერთი დაპირისპირების დროს პოლიციამ ერთი პირი ადმინსიტრაციულ სამართალდარღვევათა კოდექსის 166-ე მუხლით დააკავა, რაც წვრილმან ხულიგნობას გულისხმობს.
შეგახსენებთ, აქტივისტები და ადგილობრივი მოსახლეობა კორპუსის მშენებლობას თვეები აპროტესტებენ. თბილისის მერია და მშენებარე კომპანია კი ამტკიცებენ, რომ “ანას ბაღს” საფრთხე არ ემუქრება და მისი რეაბილიტაცია მოხდება.