მუდმივ კონტაქტზე ვართ გემზე დარჩენილ ეკიპაჟის წევრებთან, - ამის შესახებ საზღვაო ტრანსპორტის სააგენტოში "ინტერპრესნიუსს" განუცხადეს.

უწყების ინფორმაციით, შეიარაღებული პირების მიერ გატაცებულ ქართველი მეზღვაურების ჯანმრთელობას საფრთხე არ ემუქრება და ქართული მხარე აქტიურად არის ჩართული მეზღვაურების გათავისუფლების პროცესებში.

"მიმდინარეობს აქტიური მუშაობა ყველა მიმართულებით, როგორც დროშის სახელმწიფოსთან, ისე გემთმფლობელთან. ოჯახებს ყოველდღიურად ვაწვდით ინფორმაციას. ასევე, მუდმივ კონტაქტზე ვართ გემზე დარჩენილ ეკიპაჟის წევრებთან. საკითხის სენსიტიურობიდან და ჩვენი მეზღვაურების უსაფრთხოებიდან გამომდინარე, თავს ვიკავებთ დეტალების გაზიარებისგან. როგორც ჩვენ, ისე საგარეო საქმეთა სამინისტრო ყველაფერს ვაკეთებთ საკითხის მოკლე დროში გადასაწყვეტად", - აცხადებენ უწყებაში.

ცნობისთვის, 20 თებერვალს, ლიბერიის დროშის ქვეშ მცურავი ტანკერიდან 10 მეზღვაური გაიტაცეს, მათ შორის 4 საქართველოს მოქალაქეა.