ამერიკის შეერთებულმა შტატებმა და ინდოეთმა ხელი მოაწერეს შეთანხმებებს თავდაცვის, ენერგეტიკისა და ტელეკომუნიკაციების მიმართულებით, თუმცა სავაჭრო საკითხზე შეთანხმება ვერ შედგა.
აშშ-ის პრეზიდენტმა დონალდ ტრამპმა, ინდოეთში პირველი ოფიციალური ვიზიტი შეაფასა, როგორც „ძალიან ნაყოფიერი“, თუმცა მოლაპარაკებების შემდეგ, აშშ-ისა და ინდოეთის ლიდერებმა აღიარეს, რომ სავაჭრო საკითხზე შეთანხმების გაფორმება ვერ შეძლეს.
ტრამპმა განაცხადა, რომ ინდოეთის პრემიერ-მინისტრ ნარენდრა მოდისთან ერთად „ყოვლისმომცველ სავაჭრო შეთანხმებაზე“ მუშაობას გააგრძელებს.
რაც შეეხება მოლაპარაკებების შედეგებს, ტრამპის თქმით, მხარეები შეთანხმდნენ, რომ ინდოეთი აშშ-ისგან 3 მილიარდი დოლარის ღირებულების სამხედრო ტექნიკას შეიძენს. ინდოეთი და ამერიკა, ასევე ითანამშრომლებენ რადიკალური ისლამისტური ტერორიზმის წინააღმდეგ ბრძოლის საქმეში და კავშირებს გააღრმავებენ ენერგოსექტორში. ისინი მუშაობას გააგრძელებენ მეხუთე თაობის მობილური ტექნოლოგიების უსაფრთხოების სფეროშიც.