„საპარტნიორო ფონდის“ აღმასრულებელი დირექტორი დავით საგანელიძე მხარს უჭერს, რომ სარკინიგზო ინფრასტრუქტურა სახელმწიფოს საკუთრებაში დარჩეს და გადაზიდვები კერძო ინვესტორის ხელში იყოს.

„მთავრობის გადაწყვეტილებებში და პოლიტიკაში არ შევალ, თუმცაღა მე მხარს ვუჭერ, რომ რკინიგზა, როგორც ინფრასტრუქტურა, რელსები მისი ტერიტორია ბაქნები და ასე შემდეგ, სახელმწიფოს დარჩეს, ხოლო თვითონ გადაზიდვები , ლოჯისტიკა უნდა იყოს კერძო ხელში. ამისი მაგალითები ევროპაში ბევრია და ვფიქრობ, ეს საინტერესო მოდელია“,-აღნიშნა საგანელიძემ.

რაც შეეხება სახელმწიფო ელექტროსისტემას, საგანელიძის თქმით, დაწყებულია საპარტნიორო ფონდიდან ეკონომიკის სამინისტროსთვის ენერგოობიექტების გადაცემის პროცესი.

„პროცესი დაწყებულია, ენერგოობიექტების გადაცემას ვახდენთ ეკონომიკის სამინისტროზე. ეს ხანგრძლივი პროცესია. რაც შეეხება ელექტროსისტემის გასხვისებას, ეს სახელმწიფოს სტრატეგიული პოლიტიკაა და სწორი არ იქნება ფონდის ხელმძღვანელმა ისაუბროს“,-აცხადებს საგანელიძე.

ცნობისთვის, საქართველოს ფინანსთა მინისტრმა, ვანო მაჭავარიანმა ეკონომიკურ კონფერენციაზე - „საქართველო და მსოფლიო 2020“ დასმული კითხვის საპასუხოდ განაცხადა, რომ „საქართველოს რკინიგზის“ პრივატიზაცია შესაძლებელია და ამ მიმართულებით მთავრობამ უნდა იფიქროს.

როგორც მაჭავარიანმა აღნიშნა, არსებობს ევროკავშირის საუკეთესო მაგალითები, როდესაც ნიადაგი და ძირითადი ინფრასტრუქტურა რჩება სახელმწიფოს ხელში და გადაზიდვები, მათ შორის „ტრეიდინგი“ არის კომერციალიზირებული. მისივე თქმით, ამ დროს ეფექტურობა როგორც წესი, მეტია ხოლმე.

ეკონომიკის მინისტრი ნათია თურნავა კი აცხადებს, რომ მთავრობა რკინიგზის პრივატიზებას არ გეგმავს.