თუ ვინმეს მისი საქმიანობა არ მოსწონს, ამისთვის არსებობს ოპონირების ათასი ცივილური გზა.ზვიად კუპრავაზე თავდასხმა არის ამაზრზენი! ასეთ ქვეყანაში გვინდა ვიცხოვროთ?! - ამის შესახებ პოლიტიკური გაერთიანება ,,ლელო საქართველოსთვის" პოლიტსაბჭოს წევრმა ანა ნაცვლიშვილმა განაცხადა.
,,ოპოზიციის წარმომადგენლებზე და ხელისუფლების ოპონენტებზე განხორციელებული არც ერთი ძალადობა არ გამოძიებულა აქამდე. რამდენიმე შემთხვევაში მსხვერპლს იქით წაუყენეს ბრალი მოძალადეზე "თავდასხმისთვის".
ამიტომ არც ამ საქმის გამოძიებას ველი. რასაც ველი და რისთვისაც 24 საათი ვშრომობ, ესაა სისტემური რადიკალური ცვლილებები! ბევრნი ვართ! ცვლილებები იქნება!" - განაცხადა ანა ნაცვლიშვილმა, რომლის კომენტარსაც "ლელო საქართველოსთვის" პრესსამსახური ავრცელებს.
შეგახსენებთ, შინაგან საქმეთა სამინისტრომ „სამართალდამცავთა რეფორმების ცენტრის“ ხელმძღვანელ ზვიად კუპრავას მიმართ თავდასხმის ფაქტზე გამოძიება დაიწყო.
როგორც „ინტერპრესნიუსს“ უწყებაში განუცხადეს, გამოძიება სსკ-ს 126-ე მუხლის პირველი პრიმა ნაწილით დაიწყო, რაც ძალადობას გულისხმობს.
ცნობისთვის, „პრესა.ჯი“-ს დირექტორმა, გიორგი კაპანაძემ სოციალურ ქსელში გაავრცელა ინფორმაცია, რომ ზვიად კუპრავას საკუთარ სახლთან დახვდნენ და ფიზიკურად გაუსწორდნენ.