თავდაცვის ყოფილი მინისტრის, ირაკლი ოქრუაშვილის დაცვის წევრის, კობა კოშაძის საქმე დასკვნით ეტაპზეა. დღევანდელ სასამართლო პროცესზე დაცვის მხარის მტკიცებულებები გამოიკვლიეს. კერძოდ, დაიკითხა კობა კოშაძის სიმამრი და ასევე, წერილობითი მტკიცებულებები გამოიკვლიეს.
საქმის პროკურორის ალექსანდრე ჩხეიძის განმარტებით, ამ ეტაპისთვის 7-8 მოწმის ჩვენებით დასტურდება, რომ კობა კოშაძის ავტომანქანის ჩხრეკის შედეგად ამოღებულია ცეცხლსასროლი იარაღი. პროკურორის თქმით, გამოკვლეულია ასევე ნივთიერი მტკიცებულებები და ყველა მტკიცებულება ერთობლიობაში ადასტურებს, კობა კოშაძის მიერ იარაღის შეძენა-შენახვა-ტარებას.
კობა კოშაძის ადვოკატი მამუკა ჭაბაშვილი კი აცხადებს, რომ საქმეში კოშაძის წინააღმდეგ მტკიცებულებები საერთოდ არ მოიპოვება და მხოლოდ პოლიციელების ცრუ ჩვენებები არსებობს.
„ბრალდების მტკიცებულები როცა გამოვიკვლიეთ, იქ შეგვეძლო დაგვემთავრებინა, წერტილი დაგვესვა, რადგან ბრალდებამ ვერ წარმოადგინა კანონით გათვალისწინებული სტანდარტი, რომელიც დაადასტურებდა, რომ კობა კოშაძეს ნამდვილად ჰქონდა იარაღი. გამოძიების დაწყება გაყალბებული აქვთ, ასევე პატაკს პოლიციელი აწმყოში წერს, თითქოს, კობა კოშაძე აღმაშენებლის ხეივანში იარაღით გადაადგილდებოდა. ამის შემდეგ საათნახევარი კოშაძის ტელეფონს კასპის ანძა ემსახურებოდა, ანუ თბილისში საერთოდ არ იყო. დაესიზმრა პოლიციელს, რომ კოშაძე თითქოს, ქალაქში მოძრაობდა. პოლიციელები ამბობენ, 3 მანქანა მონაწილეობდა ოპერაციაშიო, კოშაძე ამბობს, რომ 7-8 მანქანა იყო. ცრუპენტელა პოლიციელების ჩვენებების გარდა, რომლებიც ელემენტარულ საკითხებში იტყუებიან, სხვა მტკიცებულება არ აქვთ, არც არც დნმ, არც მიკრონაწილაკი“, - განაცხადა ჭაბაშვილმა.