რუსეთის პრეზიდენტმა, ვლადიმერ პუტინმა უშიშროების საბჭოს საგანგებო სხდომა გამართა. რუსული მედიის ინფორმაციით, საქმე ეხება სირიის იდლიბის პროვინციაში მიმდინარე ესკალაციას.
„შეხვედრის მონაწილეებმა იმედი გამოთქვეს, რომ თურქეთის ხელისუფლება მიიღებს ყველა საჭირო ზომას რუსეთის საგარეო ინსტიტუციების და მოქალაქეების უსაფრთხოების უზრუნველსაყოფად თურქეთში“, - განაცხადა კრემლის პრესსპიკერმა, დიმიტრი პესკოვმა ჟურნალისტებთან.
მისივე თქმით, პუტინმა და რუსეთის ფედერაციის უშიშროების საბჭოს წევრებმა აღნიშნეს, რომ რუსეთმა ყველაფერი გააკეთა, რაც აუცილებელი იყო თურქეთის სამხედროების უსაფრთხოებისთვის იდლიბის სადამკვირვებლო პუნქტებში.
შეგახსენებთ, წუხელ, რუსეთის მიერ მხარდაჭერილი სირიის ასადის ჯარების თავდასხმას იდლიბის პროვინციაში 33 თურქი სამხედრო ემსხვერპლა.