ვუსამძიმრებ დაღუპულთა ოჯახებს და თურქ ხალხს, - ამის შესახებ საქართველოს პრეზიდენტმა სალომე ზურაბიშვილმა სოციალურ ქსელში დაწერა,რითაც სირიაში განვითარებულ მოვლენებს გამოეხმაურა.

„ვგლოვობ იდლიბში თურქების ტრაგიკულ სიკვდილს. ვუსამძიმრებ დაღუპულთა ოჯახებს და თურქ ხალხს, ჩვენს სტრატეგიულ პარტნიორს და მეზობელს“,-წერს სალომე ზურაბიშვილი „ტვიტერზე“.

ცნობისთვის, წუხელ, სირიის რუსეთის მიერ მხარდაჭერილი მთავრობის საჰაერო თავდასხმებს იდლიბის პროვინციაში სულ მცირე 33 თურქი სამხედრო ემსხვერპლა, ხოლო 36 დაჭრილია.

იდლიბის პროვინციის ძირითად პოზიციებზე რუსეთის დახმარებით სირიის მთავრობის ჯარებმა კონტროლი რამდენიმე დღის წინ დაამყარეს. მას შემდეგ თურქეთმა ოპოზიციის მხარდასაჭერად რეგიონში საკუთარი სამხედრო ყოფნა გააძლიერა. რამდენიმე საათის წინ, არაოფიციალურად ვრცელდებოდა ინფორმაცია, რომ თურქეთისა და სირიის აჯანყებულების ჯარებმა იდლიბის პროვინციის საკვანძო ქალაქზე, სარაქიბზე კონტროლი ხელახლა მოიპოვეს და ალეპოდან დამასკოსკენ მიმავალი გზატკეცილი გადაკეტეს.