ივანე ჯავახიშვილის სახელობის თბილისის სახელმწიფო უნივერსიტეტმა სასწავლო პროცესის დაწყება 16 მარტამდე გადადო.
როგორც „ინტერპრესნიუსს“ თსუ-ს პრესსამსახურში განუცხადეს, პრევენციის თვალსაზრისით, უნივერსისტეტის ყველა კორპუსში სადეზინფექციო სამუშაოები ჩატარდება.
შეგახსენებთ, საქართველოს პრემიერ-მინისტრის ხელმძღვანელობით, კორონავირუსთან დაკავშირებით შექმნილი უწყებათაშორისი საკოორდინაციო საბჭოს მორიგ სხდომაზე გადაწყდა, რომ პროფილაქტიკის მიზნით, ჯანდაცვის სამინისტროს მიერ რეკომენდებული დამატებითი სადეზინფექციო სამუშაოების ჩატარებისთვის, სკოლებში საგაზაფხულო არდადეგები, 9 მარტის ნაცვლად, 2 მარტიდან დაიწყება და 16 მარტამდე გაგრძელდება. ამავე მიზეზით და ამავე პერიდოში, ორკვირიანი არდადეგები გამოცხადდა საბავშვო ბაღებშიც
ამასთან, განათლების მინისტრმა მიხეილ ჩხენკელმა განაცხადა, რომ უნივერსიტეტებს რეკომენდაცია ეძლევა, დეზინფექცია ჩაატარონ და თუ ეს მოითხოვს გაზაფხულის სემესტრის დაწყების გადავადებას, თავად განსაზღვრონ სწავლის დაწყების თარიღი.