თურქეთ-საბერძნეთის საზღვარზე, საბერძნეთის პოლიციამ 4 000-მდე მიგრანტის წინააღმდეგ, რომლებიც თურქეთის გავლით საბერძნეთში შესვლას ცდილობდნენ, ცრემლსადენი გაზი გამოიყენა, - ამის შესახებ ინფორმაციას „დოიჩე ველე“ ავრცელებს.
გამოცემის ცნობით, სამართალდამცავებსა და მიგრანტებს შორის შეტაკება თურქეთის სასაზღვრო ქალაქ ედირნესთან ახლოს მოხდა. მიგრანტებმა, რომელთა უმეტესობა სირიელი ლტოლვილია, პოლიციას ქვები დაუშინეს, რასაც სამართალდამცავებმა ცრემლსადენი გაზით უპასუხეს. საბერძნეთის ხელისუფლებამ განაცხადა, რომ მათ ევროკავშირის ტერიტორიაზე მიგრანტების უკანონოდ შესვლის მცდელობა აღკვეთეს.
„მთავრობა ყველაფერს გააკეთებს ქვეყნის საზღვრების დასაცავად. ამას იდლიბთან საერთო არაფერი აქვს “, - განაცხადა საბერძნეთის მთავრობის პრესსპიკერმა სტელიოს პეტსასმა.
გამოცემა „დოიჩე ველეს“ კორესპონდენტის ინფორმაციით, „საზღვართან დგანან პატარა ბავშვიანი ოჯახები, რომლებიც გასათბობად ცეცხლს ანთებენ. ადამიანებს ბალახებზე სძინავთ, ჰაერის ტემპერატურა 7 გრადუსია. აქ არიან ადამიანები ავღანეთიდან, ირანიდან, პაკისტანიდან, სირიიდან".
შეგახსენებთ, თურქეთის პრეზიდენტმა რეჯეფ თაიფ ერდოღანმა განაცხადა, რომ თურქეთმა სირიელ მიგრანტებს ევროპასთან საზღვარი გაუხსნა. „კარი გავხსენით და აღარც დავხურავთ! რატომ? იმიტომ, რომ ევროკავშირმა თავისი პირობები უნდა შეასრულოს“, - აღნიშნა ერდოღანმა. მისივე თქმით, ქვეყანა მიგრანტთა ახალ ტალღას ვეღარ გაუმკლავდება.