სამხრეთ კორეაში კორონავირუსის გავრცელების შეჩერების მიზნით ეკლესიები დროებით დაიხურა და მრევლისთვის ონლაინ ღვთისმსახურება ტარდება.

„როიტერსის“ ინფორმაციით, ქრისტიანულმა ეკლესიებმა აღნიშნული გადაწყვეტილება მას შემდეგ მიიღეს, რაც ჯანდაცვის სამსახურებმა სამხრეთ კორეელებს შაბათ-კვირის განმავლობაში რელიგიურ რიტუალებზე დასწრებისგან თავის შეკავებისა და სახლში დარჩენისკენ მოუწოდეს.

პირველად 236 წლიანი ისტორიის მანძილზე, სამხრეთ კორეის კათოლიკურმა ეკლესიამ ქვეყნის მასშტაბით 1 700 ლოკაციაზე წირვის გადადების გადაწყვეტილება მიიღო. დაგეგმილი რიტუალები გაუქმდა ბუდისტურ ტაძრებშიც.

ბოლო ერთი დღის განმავლობაში ქვეყანაში კორონავირუსის 376 ახალი შემთხვევა დადასტურდა და დაინფიცირებულთა საერთო რაოდენობა 3 526-მდ გაიზარდა.

რაც შეეხება ფატალურ შემთხვევებს, ახალი შემთხვევა არ დადასტურებულა და გარდაცვლილთა რაოდენობა კვლავ 17-ია.